Aqtóbede qazaqtyń aty ańyzǵa aınalǵan balýany Qajymuqan Muńaıtpasulynyń 150 jyldyq mereıtoıyna oraı "Batyrs Battle" sporttyq saıysy ótti dep habarlaıdy "Adyrna" ulttyq portalynyń tilshisi.
Sharany respýblıkalyq "Qazaqstandyq sportshylar odaǵy" uıymdastyrdy. Al baǵdarlama "Sátti Juldyz" AQ jáne "Sportqory" qarjylyq qoldaýymen júzege asty. Jobanyń avtory — QR Mádenıet jáne sport mınıstrliginiń ambassadory, kúsh qoldanylatyn sport túrlerinen 4 dúrkin rekordsmen Sergeı yrýlnıkov.
Sharaǵa qonaq retinde ziltemirshi, birneshe dúrkin Álem chempıony Ilıa Ilın jáne bokstan Álem jáne Azııa chempıony Galıb Djafarov qatysty.
«Jekpe-jek» sport saraıynda ótken saıysqa Aqtóbe oblysynan 8 sportshy qatysty. Olar 60-90 keli qapty bıikke kóterý, metall shybyqty maıystyrý, bórene, tas kóterý, beldesý boıynsha synǵa tústi. Nátıjesinde Sergeı Goncharov jeńimpaz atandy. Al II oryndy Dmıtrıı Emelıanov, III oryndy Tólegen Áljanov ıelendi.
Úzdik atanǵan Sergeı Goncharov alda Nur-Sultan qalasynda ótetin respýblıkalyq jarysta Aqtóbeniń namysyn qorǵaıtyn bolady.
— «Batyrs Battle» saıysy buǵan deıin Óskemen qalasynda uıymdastyryldy. Endi Aqtóbemen qatar mundaı shara elimizdiń Túrkistan jáne Nur-Sultan qalalarynda ótedi. Qajymuqan babamyz — kúrestiń birneshe túrinen álem chempıony atanǵan qazaqtan shyqqan tuńǵysh kúsh ıesi. Sondyqtan búgingi shara Qajymuqan, Balýan Sholaq babalarymyzdyń jattyǵý úrdisin jalǵap, halyq arasynda keńinen nasıhattaý úshin ótkizilip otyr, — deıdi respýblıkalyq «Qazaqstannyń sportshylar odaǵy» qoǵamdyq birlestiginiń tóraǵasy Azamat Qarlyǵashov.
Al ziltemirshi, birneshe dúrkin Álem chempıony Ilıa Ilınniń aıtýynsha, mundaı sharanyń elimizde, onyń ishinde Aqtóbe óńirinde uıymdastyrylýy — óte qýantarlyq jaǵdaı. Bul bastamany kótergen aqtóbelikterdiń belsendiligine sóz joq.
"Adyrna" ulttyq portaly.
