تۇرمەگە تىيىم سالىنعان زاتتاردى وتكىزبەك بولعان قىزىلوردالىق جۇك تاسىمالداۋشى ۇستالدى، دەپ حابارلايدى «ادىرنا» ءتىلشىسى قىزىلوردا وبلىسى بويىنشا قاجد-عا سىلتەمە جاساپ.
9 شىلدەدە قىزىلوردا وبلىسى بويىنشا قاج دەپارتامەنتىنە قاراستى زك-169/5 مەكەمەسىنىڭ قىزمەتكەرلەرىمەن مەكەمەگە وتپەك بولعان كاماز جۇك كولىگىندەگى تسەمەنت سالىنعان قاپتاردى تەكسەرۋ بارىسىندا سوتتالعانداردىڭ پايدالانۋى مەن قولدانىلۋىنا تىيىم سالىنعان زاتتار انىقتالعان.
«جەدەل تۇردە “102” نومىرىنە حابارلانىپ، مەكەمەگە قىزىلوردا قالالىق پوليتسيا باسقارماسىنىڭ جەدەل-تەرگەۋ توبى شاقىرتىلدى. جۇك كولىگىندەگى 196 قاپ تسەمەنتتىڭ جەتى قابىنان 10 جانە 20 گرامدىق شپريتسكە نىعىزدالىپ سالىنعان 63 دانا “وزىنە ءتان ەرەكشە ءيسى بار ءشوپ تەكتەس” زاتتى، 43 دانا ۇيالى تەلەفون، 14 دانا قۇلاققاپ، 33 دانا زاريادتاۋ قۇرىلعىسى، 13 دانا SIM-كارتا، 12 دانا ناسىباي، 10 دانا ويىن كارتاسى جانە ءۇش ليتر سپيرتتىك ىشىمدىك تاركىلەنىپ الىندى»،– دەلىنگەن حابارلامادا.
تاركىلەنگەن زاتتار بويىنشا سوت ساراپتاما جۇمىستارى تاعايىندالدى. اتالعان دەرەك بويىنشا قازاقستان رەسپۋبليكاسى قك-ءنىڭ 297-بابىنىڭ 1-بولىگىمەن سوتقا دەيىنگى تەرگەپ-تەكسەرۋ امالدارى جۇرگىزىلۋدە.
«ادىرنا» ۇلتتىق پورتالى
