مەكتەپ دارەتحاناسىندا 7 جاستاعى نەمەرەمدى زورلادى دەپ جانايقايىن ايتقان اقتوبەلىك تۇرعىنعا وبلىستىق ءبىلىم باسقارماسىنىڭ باسشىسى جاۋاپ بەردى. ونىڭ ايتۋىنشا، 1-سىنىپتا وقيتىن بالامدى 9-سىنىپتىڭ ءتورت وقۋشىسى زورلادى دەگەن ارىزدى اناسى №3 پوليتسيا بولىمشەسىنە بيىل 31 ناۋرىزدا ءتۇسىرىپتى. مەكتەپ باسشىلىعى بۇل تۋرالى پوليتسيا بولىمىندە عانا ەستىگەن. ال ءزابىر كورگەن بالا بولسا ءوزىن قورلاعانداردى ناقتىلاپ ايتا الماپتى. باسقارما باسشىسى ەگەر زورلاۋ دەرەگى راستالاتىن بولسا، قاتاڭ جازا قولدانىلادى دەپ وتىر. تەرگەۋ اياقتالعان سوڭ مەكتەپ اكىمشىلىگىنە قاتىستى شارا قولدانۋ ماسەلەسى دە كوتەرىلگەن. جاعدايدى ايماق اكىمى وڭداسىن ورازالين تىكەلەي باقىلاۋىنا الىپتى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
«ارىز بويىنشا كامەلەتتىك جاسقا تولماعان بالاعا قاتىستى سەكسۋالدىق سيپاتتاعى زورلىق ارەكەت فاكتىسىمەن قىلمىستىق ءىس تىركەلىپ، سوت-مەديتسينالىق ساراپتاماسى تاعايىندالدى. العاشقى ساراپتاماسىنىڭ قورىتىندىسى بويىنشا، زورلىق فاكتىسى انىقتالعان جوق. كەيىن بالانىڭ اۋرۋ تاريحى بويىنشا قوسىمشا سوت-مەديتسينالىق ساراپتاما تاعايىندالىپ، بۇگىنگى كۇنگە دەيىن جۇرگىزىلۋدە»، - دەيدى وبلىستىق ءبىلىم باسقارماسىنىڭ باسشىسى جولداس باتىرحان.
"ادىرنا" ۇلتتىق پورتالى
