شىمكەنتتە جاس بالالارعا قاتىستى جىنىستىق قىلمىس جاساعانى ءۇشىن جازاسىن وتەپ جاتقان ءۇش تۇتقىنعا حيميالىق كاستراتسيا جاسالدى. ايىپتالۋشىلار جەرگىلىكتى جۋرناليستەرگە بۇل ءراسىم جىنىستىق دەنساۋلىقتى عانا ەمەس، جالپى دەنساۋلىققا دا زيانىن تيگىزەتىنىن ايتتى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.
مارات ەسىمدى (اتى وزگەرتىلگەن) تۇتقىنعا تەمىر توردىڭ ار جاعىندا ءالى 15 جىل وتىرۋ كەرەك. ول كامەلەتكە تولماعان قىزدى زورلاۋعا تىرىسقانى ءۇشىن سوتتالعان. وسىعان ۇقساس باپتار بويىنشا سوتتالعاندارمەن بىرگە ول حيميالىق كاستراتسيادان ءوتتى. تۇتقىن تەلەارنا جۋرناليستەرىنە ينەكتسيادان كەيىن دەنساۋلىعى الدەقايدا جاعدايى ناشارلاعانىن ايتتى.
«سوت 15 جىلعا قاتاڭ رەجيمدە جازا وتەۋ قاجەتتىگى جايلى شەشىم شىعاردى. تاعى كاستراتسيا جاساۋدى بۇيىردى. مەنىڭ ىسىمدە زورلىق-زومبىلىق جاساۋعا تىرىستى دەپ جازىلعان، بىراق قازىر نە ىستەۋ كەرەك؟ ەر دەنساۋلىعى جاعىنان ءبارى ناشارلاپ كەتتى، ماعان جىنىستىق ءومىر كەرەك، بىراق ول جاقتا ەشتەڭە جۇمىس ىستەپ تۇرعان جوق. نەگە كاستراتسيا جاساۋى كەرەك؟ ءيا، مەن كىنالىمىن، مويىندايمىن. بىراق ەندى نە ىستەيمىن؟ مەنىڭ دە ءومىر سۇرگىم كەلەدى عوي. مەنىڭ وتباسىم، بالالارىم بار!» — دەيدى ول.
يچ-167/3 قاتاڭ رەجيمدەگى كولونيادا جۇزدەن استام سوتتالۋشى 124-باب "كامەلەتكە تولماعانداردى ازعىرۋ" بويىنشا جازاسىن وتەپ جاتقانىن ايتادى. ۇشەۋى حيميالىق كاستراتسيا جاساعان، ولارمەن پسيحولوگتار مەن مەديتسينالىق-سانيتاريالىق ءبولىم دارىگەرلەرى جۇمىس ىستەپ جاتىر.
«ءبىزدىڭ كولونيادا 700-دەن استام سوتتالعاندار بار، ولاردىڭ جۇزدەن استامى «پەدوفيليا» بابى بويىنشا، ءۇش سوتتالعان ادامعا كاستراتسيا قولدانىلعان. سودان كەيىن كاستراتسيا تاعايىندالعان ادامدارعا جوسپار بويىنشا ينەكتسيا ەنگىزىلەدى»، – دەدى مەكەمە باسشىسىنىڭ ورىنباسارى ماعجان ەسىمبەك.
وتىرار ارناسىنىڭ مالىمەتىنشە، 2021 جىلدىڭ سوڭىنا دەيىن پەدوفيليا ءۇشىن سوتتالعان 30 ادام بوستاندىققا شىعادى. ولار حيميالىق كاستراتسياعا ىلىنبەيدى، ويتكەنى ولاردىڭ بارلىعىنا وسى زاڭ قازاقستاندا كۇشىنە ەنگەنگە دەيىن ۇكىمدەرى شىعارىلعان.
قازىر كاستراتسياعا قاتىستى كوپتەگەن پىكىرتالاستار بار، كەيبىرەۋلەر كاستراتسيانىڭ ءمانى جوق دەيدى، ويتكەنى بۇل تەك ۋاقىتشا اسەر بەرەدى دەسە، ەندى ءبىرى، كەرىسىنشە، بوساتىلعاننان كەيىن دە سوتتالعاندارعا ۇنەمى ينەكتسيا سالىپ وتىرۋ كەرەك دەپ سانايدى.
"ادىرنا" ۇلتتىق پورتالى
