كەشە الەمدەگى ەڭ ءىرى پورتتاردىڭ ءبىرى — دۋبايدا كونتەينەر كەمەسىندە جويقىن جارىلىس بولىپ، بىرىككەن اراب امىرلىكتەرىندەگى ساۋدا ورتالىعىندا دۇمپۋلەر ورىن العان دەپ حابارلايدى «ادىرنا» ۇلتتىق پورتالى «centralasia.media-عا» سىلتەمە جاساپ.
جارىلىس دجەبەل-الي پورتىنداعى سىيىمدىلىعى 130 كونتەينەرگە ارنالعان شاعىن كەمەدە بولعان.
ءورت سالدارىنان دۋبايدىڭ تۇكپىر-تۇكپىرىندە دۇمپۋلەر بولعان جانە جارىلىس پورتتان 25 كم راديۋستا سەزىلگەن. جارىلىستان كەيىن شامامەن 2,5 ساعات وتكەن سوڭ دۋبايدىڭ ازاماتتىق قورعانىس دەپارتامەنتى ءورتتى باقىلاۋعا العاندىقتارىن جانە قازىرگى ۋاقىتتا ءورت ماسەلەسىمەن اينالىسىپ جاتقاندىقتارىن مالىمدەدى.
الدىن الا مالىمەتتەر بويىنشا جارىلىستان زارداپ شەككەندەر جوق.
دۋبايدىڭ سولتۇستىگىندەگى دجەبەل-الي پورتى بۇل الەمدەگى ەڭ ءىرى جاساندى تەرەڭ سۋ ايلاعى جانە ءۇندى سۋبكونتينەنتىنەن، افريكا مەن ازيادان كەلەتىن جۇكتەرگە قىزمەت كورسەتەدى. پورت — ماڭىزدى الەمدىك جۇك تورابى عانا ەمەس، سونداي-اق دۋباي مەن ونىڭ ماڭىنداعى امىرلىكتەر ءۇشىن ماڭىزدى يمپورتتى تاۋارلار ايماعى.
«ادىرنا» ۇلتتىق پورتالى.
