سىرىڭكەدەن ءتۇرلى ماكەتتەردى جاسايتىن شاحتەردى بىلەسىز بە؟

8459
Adyrna.kz Telegram

"قازاقالتىن" تاۋ-كەن مەتاللۋرگيا كومبيناتىنىڭ جولىمبەت كەنىشىندە شاحتەر بولىپ جۇمىس ىستەيتىن سامات ءجۇنىسوۆتىڭ ەرەكشە ءحوببيى بار. ول كادىمگى سىرىڭكە شىرپىسىنان كورگەن كوزدى سۇيسەنتەر تۋىندىلاردى جاسايدى. «ادىرنا» ءتىلشىسى شەبەرمەن تىلدەسىپ، اۋەسقوي ءىسى تۋرالى سۇراپ ءبىلدى.

– ماكەتتەردى مودەلدەۋمەن بالا كەزىمنەن اينالىسامىن. باستاپقىدا ولاردى قاتىرما قاعازدان جاساپ ءجۇردىم. 2015 جىلى «نەگە سىرىڭكەدەن جاساپ كورمەسكە؟» دەگەن وي كەلدى. سەبەبى شىرپى – قولجەتىمدى ماتەريالداردىڭ ءبىرى، ءارى ەستەتيكالىق تۇرعىدان ادەمى كورىنەدى. وسىلايشا بۇل ىسكە دەگەن قىزىعۋشىلىعىم ارتا ءتۇستى.

بۇگىندە سامات ءجۇنىسوۆ ءوز قولىمەن وننان استام تۋىندىنى جاساعان. ول جۇمىسىن سىزبالار مەن سحەمالاردىڭ كومەگىنسىز قۇراستىرادى.

– مەشىت ارحيتەكتۋراسى قاتتى ۇنايدى. ەڭ ءبىرىنشى نۇر-استانا مەشىتىنىڭ ماكەتىن جاساعان بولاتىنمىن. ودان بولەك كوللەكتسيامدا ءتۇرلى ۇيلەردىڭ، ەيفەل مۇراناسى مەن ەحرو-2017 عيماراتىنىڭ ماكەتتەرى بار. بارلىق جۇمىسىم وسى ىسكە اۋەستەنۋىمە سەبەپكەر بولعان ايشا اجەمە ارنالادى.

اڭگىمە بارىسىندا قوناعىمىز تۋىندىلاردى قۇراستىرۋ بارىسىنداعى ەڭ قيىن نارسەنى اتاپ ءوتتى.

– بارىنەن بۇرىن ءىستى باستاۋ وڭايعا سوقپايدى. ول ءۇشىن شىدامدىلىق پەن ەپتىلىك تە اسا قاجەت. ماكەتتىڭ تەرەزەسىن جاساۋ ۇزاق ۋاقىتتى الادى. ال مەشىت جاساۋداعى ەڭ قيىن نارسە – ونىڭ كۇمبەزىن تۇرعىزۋ. جۇمىستارىمنىڭ جاسالۋ مەرزىمى ءارتۇرلى. 2 ايدان 1 جىلعا دەيىن سوزىلۋى مۇمكىن.

اقمولالىق شەبەر تاپسىرىس قابىلدايتىنىن جاسىرمادى.

«ءيا، تاپسىرىسقا دا جاساپ تۇرامىن. بۇنداي جۇمىستارعا سۇرانىس بار، الايدا كوپ ەمەس»،– دەپ ءسوزىن قورىتىندىلادى ول.

اڭگىمەلەسكەن ديانا اسان،

«ادىرنا» ۇلتتىق پورتالى

پىكىرلەر