اقتاۋ قالاسىندا ەل تاۋەلسىزدىگىنىڭ 30 جىلدىعى اياسىندا جانە استانا كۇنىنە وراي جاڭا تۇرعىنۇي كەشەنى پايدالانۋعا بەرىلدى. 7,9 جانە 12 قاباتتان تۇراتىن ۇيلەر «نۇرلى جەر» مەملەكەتتىك باعدارلاماسى اياسىندا بوي كوتەرگەن. سالتاناتتى شاراعا قاتىسقان اقتاۋ قالاسىنىڭ اكىمى ن.قيلىباي باسپانالى بولعان تۇرعىنداردى جاڭا قونىسىمەن قۇتتىقتادى، دەپ حابارلايدى «ادىرنا» ۇلتتىق پورتالى ماڭعىستاۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.
«مەملەكەت قولداۋىنىڭ ناتيجەسىندە باسپانالى بولىپ، قونىس تويىن تويلايتىندار سانى ارتىپ كەلەدى. وتكەن اپتادا اقتاۋدا 216 وتباسى جاڭا ۇيگە كىرىپ، قۋانىشقا كەنەلگەن ەدى. مىنە بۇگىن استانا كۇنى قارساڭىندا تاعى ءبىر توپ تۇرعىنعا پاتەر كىلتىن تابىستادىق. مەرەكەمەن تۇسپا-تۇس كەلگەن قونىس تويلارىڭىز قۇتتى بولسىن. شاڭىراقتارىڭىز شاتتىققا تولى بولىپ، بەرەكە-بىرلىگىمىز ارتا بەرسىن»، - دەدى قالا اكىمى.
33 شاعىناۋداندا ورنالاسقان 670 پاتەردەن تۇراتىن «اققۋ-3» تۇرعىن ءۇي كەشەنىنىڭ العاشقى بولىگى وتكەن ايدا قولدانىسقا بەرىلگەن ەدى. بۇل جولى 227 پاتەرى تابىستالدى. ءۇش بولىكتەن تۇراتىن تۇرعىن ءۇي كەشەنىنىڭ قالعان بولىگىن اياقتاۋ جۇمىستارى قارقىندى ءجۇرىپ جاتىر.
«اققۋ-3» تۇرعىن ءۇي كەشەنىنەن جاڭا پاتەرگە يە بولعاندار – ءتۇرلى سانات بويىنشا اقتاۋ قالاسى اكىمدىگىندە كەزەكتە تۇرىپ، «وتباسى» بانكى ارقىلى بايقاۋدان ىرىكتەلگەندەر. سالتاناتتى شاراعا جينالعاندار جاس وتباسى مەيرام ساپارباەۆتىڭ جاڭا شاڭىراڭىندا بولىپ، پاتەر ءىشىن ارالاپ كوردى.
«مەملەكەتتىڭ قول جەتىمدى باعدارلاماسى ارقاسىندا، بۇگىن ءبىزدىڭ وتباسىمىز ءۇشىن قۋانىشتى كۇن. 5 جىلدان استام ۋاقىت جاڭا پاتەردى كۇتتىك. بۇگىن مەملەكەتتىك باعدارلاما ارقىلى 3 بولمەلى پاتەرگە يە بولدىق. مەملەكەتتىڭ جاس وتباسىلار مەن وزگە دە ساناتتاعى ازاماتتار قولداۋى ءۇشىن راحمەت»، - دەيدى تۇرعىن.
قالا باسشىسى ن.قيلىبايدىڭ ايتۋىنشا، ەلىمىزدە قولجەتىمدى باسپانا ماسەلەسىن شەشۋگە ايرىقشا كوڭىل بولىنۋدە. بيىل وبلىس ورتالىعىندا 86 مىڭ شارشى مەتر تۇرعىن ءۇي سالۋ جوسپارلانعان. بۇل ۇيلەردى مەملەكەت باسشىسىنىڭ تاپسىرماسىمەن ازىرلەنگەن باعدارلامالارعا سايكەس «وتباسى» بانكى ارقىلى الۋعا مۇمكىندىك بەرىلەدى.
"ادىرنا" ۇلتتىق پورتالى
