شىمكەنتتىك ۇستازدار بىلىكتىلىگىن ارتتىرۋ ءۇشىن جالعان اتتەستاتسيا جاساتىپ، سەرتيفيكاتتى ساتىپ العان دەپ حابارلايدى "ادىرنا" ۇلتتىق پورتالى "24.kz-كە" سىلتەمە جاساپ.
وڭىردەگى 348 مۇعالىم 2018-2019 جىلدارى جەڭىل جولدى تاڭداپ، ءوز ساناتىن جوعارىلاتقان. مەملەكەتتەن تولەنەتىن ۇستەماقىنى دا الىپ وتىرعان. وزگە ۇستازدار ارىپتەستەرىنىڭ بۇل ءىسىن قۇقىق قورعاۋ ورگاندارىنا جەتكىزدى. كەيىن قارجى پوليتسياسىنىڭ ماماندارى تەستىلەۋدەن وتكەندەردىڭ ءتىزىمىن جاساقتاپ، رەسپۋبليكالىق تەست ورتالىعىنا جۇگىنگەن.
قالاداعى جالپى 64 مەكتەپتىڭ كوپتەگەن قىزمەتكەرى تەستكە كەلمەگەنى بەلگىلى بولدى. كەيبىرى سىناقتان سۇرىنگەن. ولار جالعان ءمور باسىلعان قۇجات ساتىپ العان.
مۇعالىمدەردىڭ 80%-ى ەكى جىلدىڭ ىشىندە العان ۇستەماقىلارىن بيۋدجەتكە قايتارىپ ۇلگەرىپتى. ەندى ولار قايتادان تەست تاپسىرادى. ال سەرتيفيكاتتى ساتىپ، جەڭىل جولدى كاسىپ ەتكەندەردىڭ ءىسى قازىر سوتتا قارالىپ جاتىر.
– مۇعالىمدەردىڭ جالعان اتتەستاتسياسىنا قاتىستى قازىرگى ۋاقىتتا قىلمىستىق ءىس قوزعالىپ، الاياقتىق ءۇشىن سوت پروتسەسى ءجۇرىپ جاتىر، — دەيدى شىمكەنت قالالىق ءبىلىم باسقارماسىنىڭ باسشىسى جانات تاجيەۆا.
"ادىرنا" ۇلتتىق پورتالى.
