بۇگىندە قازاقستانداعى باستى تاقىرىپ ەكپە الۋ ماسەلەسى بولىپ وتىر. وسى ورايدا قر دەنساۋلىق ساقتاۋ مينيسترلىگى ەكپە الۋ تۋرالى ەلەكتروندى قۇجاتتاردى قولدان جاساۋ دەرەكتەرى انىقتالعانىن مالىمدەدى دەپ حابارلايدى "ادىرنا" ۇلتتىق پورتالى.
ەڭ قىزىعى، مۇنداي جالعان تولقۇجاتتاردى تۇپنۇسقادان اجىراتۋ مۇمكىن ەمەس ەكەنىن اتاپ ءوتتى مينيسترلىكتەگىلەر.
«كەي ادامدار ۆاكتسينالاۋ تۋرالى ەلەكتروندى پاسپورت ساتىپ الۋعا دا ءوتىنىش بىلدىرگەن. جەكە ازاماتتار دا الەۋمەتتىك جەلىلەرگە جانە دەنساۋلىق ساقتاۋ مينيسترلىگىنە جۇگىنىپ، ۆاكتسينالاۋ پاسپورتىن ساتۋ فاكتىلەرى بولعانىن ايتتى. ءبىز ءوز تاراپىمىزدان اقپاراتتىق جۇيە تۇرعىسىنان دەرەكتەردىڭ دۇرىستىعىنا قارايمىز. قالاي بولعاندا دا مەديتسينا ۇيىمىنىڭ قىزمەتكەرلەرى دەرەكتەردى اقپاراتتىق جۇيەگە ەنگىزەدى. بۇل – ولاردىڭ جاۋاپكەرشىلىگى. سونداي-اق، جەرگىلىكتى اتقارۋشى ورگاندار دەڭگەيىندە كىم جانە قالاي ساتقانىن انىقتاۋ بويىنشا جۇمىس جۇرگىزىلۋدە. ازىرگە بۇكىل ەل بويىنشا مالىمەت جيناقتاعان جوقپىز»، - دەدى قر دسم ەلەكتروندىق دەنساۋلىق ساقتاۋدى دامىتۋ دەپارتامەنتىنىڭ ديرەكتورى بەيبىت ەسەنباەۆ.
ونىڭ ايتۋىنشا، كەي ازاماتتار مەديتسينا قىزمەتكەرلەرىنەن سىياقىعا ۆاكتسينا العاندىعى تۋرالى دەرەكتەردى اقپاراتتىق جۇيەگە ەنگىزۋدى سۇراعان.
«مۇندا پاسپورتتىڭ جالعان نە شىندىق ەكەنىن تابۋ مۇمكىن ەمەس. ويتكەنى، ۆاكتسينانى جاساعان دارىگەرگە اقپاراتتىق جۇيە زاڭدى تۇردە قولجەتىمدى جانە وسى دەرەكتەردى ەنگىزە الادى. بۇل دا – ونىڭ مەديتسينالىق ۇيىمنىڭ قىزمەتكەرى رەتىندەگى جاۋاپكەرشىلىگى. جالعان دەرەكتەردى ەنگىزگەنى ءۇشىن دە بەلگىلى ءبىر جاۋاپكەرشىلىك قاراستىرىلعان»، - دەدى ول.
دەپارتامەنت ديرەكتورى جالعان پاسپورتتارعا قاتىستى اقپاراتتىق جۇيەدە دەرەكتەردى كىم، قاشان جۇرگىزگەنى تەكسەرىلىپ جاتقانىن ايتتى. قاتە اقپارات ەنگىزۋ فاكتىلەرى مەديتسينا ۇيىمدارى مەن دەنساۋلىق ساقتاۋ باسقارماسى دەڭگەيىندە دە انىقتالۋعا ءتيىس.
«ۆاكتسينالاۋ پاسپورتى بۇرىن ءۇش تىلدە ءۇش بەت بولاتىن. قازىر ءۇش تىلدە بەرىلەتىن اقپارات ءبىر بەتتە بولادى. سونداي-اق، ازاماتتىڭ جەكە مالىمەتى تۋرالى اقپاراتتى – تولقۇجات ءنومىرى، تۋعان جىلىن جانە QR-كود قوسامىز. QR-كودتى سكانەرلەپ، دەنساۋلىق ساقتاۋ مينيسترلىگىنىڭ مەملەكەتتىك رەسۋرسىنا كىرۋگە بولادى، وندا وسى ەلەكتروندى پاسپورتتىڭ تۇپنۇسقا نەمەسە جالعان ەكەنىن تەكسەرۋگە بولادى»، — دەدى بەيبىت ەسەنباەۆ.
"ادىرنا" ۇلتتىق پورتالى.
