Бүгінде Қазақстандағы басты тақырып екпе алу мәселесі болып отыр. Осы орайда ҚР Денсаулық сақтау министрлігі екпе алу туралы электронды құжаттарды қолдан жасау деректері анықталғанын мәлімдеді деп хабарлайды "Адырна" ұлттық порталы.
Ең қызығы, мұндай жалған төлқұжаттарды түпнұсқадан ажырату мүмкін емес екенін атап өтті министрліктегілер.
«Кей адамдар вакциналау туралы электронды паспорт сатып алуға да өтініш білдірген. Жеке азаматтар да әлеуметтік желілерге және денсаулық сақтау министрлігіне жүгініп, вакциналау паспортын сату фактілері болғанын айтты. Біз өз тарапымыздан ақпараттық жүйе тұрғысынан деректердің дұрыстығына қараймыз. Қалай болғанда да медицина ұйымының қызметкерлері деректерді ақпараттық жүйеге енгізеді. Бұл – олардың жауапкершілігі. Сондай-ақ, жергілікті атқарушы органдар деңгейінде кім және қалай сатқанын анықтау бойынша жұмыс жүргізілуде. Әзірге бүкіл ел бойынша мәлімет жинақтаған жоқпыз», - деді ҚР ДСМ электрондық денсаулық сақтауды дамыту департаментінің директоры Бейбіт Есенбаев.
Оның айтуынша, кей азаматтар медицина қызметкерлерінен сыйақыға вакцина алғандығы туралы деректерді ақпараттық жүйеге енгізуді сұраған.
«Мұнда паспорттың жалған не шындық екенін табу мүмкін емес. Өйткені, вакцинаны жасаған дәрігерге ақпараттық жүйе заңды түрде қолжетімді және осы деректерді енгізе алады. Бұл да – оның медициналық ұйымның қызметкері ретіндегі жауапкершілігі. Жалған деректерді енгізгені үшін де белгілі бір жауапкершілік қарастырылған», - деді ол.
Департамент директоры жалған паспорттарға қатысты ақпараттық жүйеде деректерді кім, қашан жүргізгені тексеріліп жатқанын айтты. Қате ақпарат енгізу фактілері медицина ұйымдары мен денсаулық сақтау басқармасы деңгейінде де анықталуға тиіс.
«Вакциналау паспорты бұрын үш тілде үш бет болатын. Қазір үш тілде берілетін ақпарат бір бетте болады. Сондай-ақ, азаматтың жеке мәліметі туралы ақпаратты – төлқұжат нөмірі, туған жылын және QR-код қосамыз. QR-кодты сканерлеп, Денсаулық сақтау министрлігінің Мемлекеттік ресурсына кіруге болады, онда осы электронды паспорттың түпнұсқа немесе жалған екенін тексеруге болады», — деді Бейбіт Есенбаев.
"Адырна" ұлттық порталы.
