كۋبا ەكى جاستان اسقان بالالاردى كوروناۆيرۋسقا قارسى ۆاكتسيناتسيالاي باستاعان الەمدەگى العاشقى ەل بولىپ تانىلىپ، 2 مەن 18 جاس ارالىعىنداعى بالالارعا وتاندىق «سوبەرانا-2» ۆاكتسيناسىن سالا باستادى، دەپ حابارلايدى "ادىرنا" ۇلتتىق پورتالى.
كلينالىق سىناقتارعا سايكەس اتالعان ەكپەنىڭ بالالارعا قاۋىپسىز ەكەنى دالەلدەنگەن. ال ەرەسەكتەر جەرگىلىكتى ماماندار ازىرلەگەن «ابدالا» اتتى ەكىنشى ەكپەنى قابىلداۋدا.
5 قىركۇيەكتەگى جاعداي بويىنشا قازىر كۋبادا 4,09 ميلليون ادام كوروناۆيرۋسقا قارسى تولىق ەگىلدى - بۇل حالىقتىڭ 36,1% كورسەتكىشىن قۇرايدى. پاندەميا باستالعاننان بەرى ەلدە كوروناۆيرۋستىڭ 696 904 جاعدايى تىركەلدى، ودان 5 788 كۋبالىق قايتىس بولدى. ەل حالقىنىڭ سانى 11,33 ملن. بيلىك وسى ايدىڭ اياعىنا دەيىن حالىقتىڭ 90%-ىنا ەكپە سالىپ ۇلگەرەمىز دەيدى.
ايتا كەتەيىك، وتكەن اپتادا كۋبادا كۇنىنە 7 مىڭ ادام ىندەت جۇقتىرىپ، 70-80 كىسى كوز جۇمعان بولاتىن. ماماندار بۇل 100 مىڭ تۇرعىنعا شاققاندا الەمدەگى ەڭ جوعارى كورسەتكىشتەردىڭ ءبىرى دەپ ەسەپتەيدى.
"ادىرنا" ۇلتتىق پورتالى