شىلدەنىڭ ورتاسىنان باستاپ ۆاكتسينا الماعان قىزمەتكەردىڭ جۇمىس ىستەۋىنە رۇقسات بەرگەن باسشىلارعا 1,5 ميلليون تەڭگە ايىپپۇل سالىنادى. قىزمەتكەردىڭ ءوزى كەم دەگەندە 15 مىڭ تەڭگە تولەۋى مۇمكىن. الايدا بيزنەسمەندەر قىسقا ۋاقىت ىشىندە ءبارىن ۆاكتسينالاۋ مۇمكىن ەمەستىگىن ايتادى دەپ حابارلايدى "ادىرنا" ۇلتتىق پورتالى "استانا" تەلەارناسىنا سىلتەمە جاساپ.
"قازاقستاننىڭ باس مەملەكەتتىك سانيتاريا دارىگەرىنىڭ قاۋلىسىنا باعىنباي، قىزمەتكەرگە ۆاكتسينا الماي نەمەسە جەتى كۇن سايىن پتر-سىناما تاپسىرماي جۇمىس ىستەۋىنە رۇقسات بەرگەن باسشىلار اقبتك-ءنىڭ 462 نەمەسە 425-بابى بويىنشا جازالانادى", - دەپ ءتۇسىندىردى سانەپيدەمباقىلاۋ كوميتەتىنىڭ رەسمي وكىلى ەرجان بايتاناەۆ.
الايدا كاسىپكەرلەر مۇنداي شاراعا دايىن ەمەستىگىن ايتادى. ولار قىزمەتكەرلەردى مىندەتتى ۆاكتسينالاۋ مەرزىمىن ۇزارتۋدى سۇرايدى. قازىرگى ۋاقىتتا قوعامدىق تاماقتانۋ سالاسىندا ەكى ميلليون ادام جۇمىس ىستەيدى. جارتى ايدا بارىنە ەكپە سالىپ ۇلگەرۋى مۇمكىن ەمەس. ونىڭ ۇستىنە بيزنەسمەندەر ءبارىن ۆاكتسينا الۋعا ماجبۇرلەي المايدى.
ء"بىز ۆاكتسيناتسيانى قولدايمىز، بىراق مۇنداي قىسقا مەرزىمدە ەمەس. ول مۇمكىن ەمەس. قازىر كاسىپكەرلەر ءوز ەسەبىنەن سكرينينگ جۇرگىزىپ جاتىر. كەم دەگەندە 1-15 قىركۇيەككە دەيىن مەرزىمدى ۇزارتۋ قاجەت", - دەدى قازاقستاننىڭ قوعامدىق تاماقتانۋ قاۋىمداستىعى توراعاسىنىڭ كەڭەسشىسى ۆەرونيكا نۇرپەيىسوۆا.
ايتا كەتۋ كەرەك، 2 شىلدەدەن باستاپ ەلىمىزدە بارلىق قىزمەتكەرى ۆاكتسينا سالدىرۋى ءتيىس نىسانداردىڭ كەڭەيتىلگەن ءتىزىمى شىققان بولاتىن. ولاردىڭ قاتارىنا بازارلار، سۇلۋلىق سالوندارى، ءدامحانالار، مەيرامحانالار، قىزمەت كورسەتۋ نىساندارى جانە جاپپاي باراتىن باسقا دا ورىندار كىرەدى.
"ادىرنا" ۇلتتىق پورتالى.
