Shildeniń ortasynan bastap vakına almaǵan qyzmetkerdiń jumys isteýine ruqsat bergen basshylarǵa 1,5 mıllıon teńge aıyppul salynady. Qyzmetkerdiń ózi kem degende 15 myń teńge tóleýi múmkin. Alaıda bıznesmender qysqa ýaqyt ishinde bárin vakınalaý múmkin emestigin aıtady dep habarlaıdy "Adyrna" ulttyq portaly "Astana" telearnasyna silteme jasap.
"Qazaqstannyń bas memlekettik sanıtarııa dárigeriniń qaýlysyna baǵynbaı, qyzmetkerge vakına almaı nemese jeti kún saıyn PTR-synama tapsyrmaı jumys isteýine ruqsat bergen basshylar ÁQBtK-niń 462 nemese 425-baby boıynsha jazalanady", - dep túsindirdi sanepıdembaqylaý komıtetiniń resmı ókili Erjan Baıtanaev.
Alaıda kásipkerler mundaı sharaǵa daıyn emestigin aıtady. Olar qyzmetkerlerdi mindetti vakınalaý merzimin uzartýdy suraıdy. Qazirgi ýaqytta qoǵamdyq tamaqtaný salasynda eki mıllıon adam jumys isteıdi. Jarty aıda bárine ekpe salyp úlgerýi múmkin emes. Onyń ústine bıznesmender bárin vakına alýǵa májbúrleı almaıdy.
"Biz vakınaııany qoldaımyz, biraq mundaı qysqa merzimde emes. Ol múmkin emes. Qazir kásipkerler óz esebinen skrınıng júrgizip jatyr. Kem degende 1-15 qyrkúıekke deıin merzimdi uzartý qajet", - dedi Qazaqstannyń qoǵamdyq tamaqtaný qaýymdastyǵy tóraǵasynyń keńesshisi Veronıka Nurpeıisova.
Aıta ketý kerek, 2 shildeden bastap elimizde barlyq qyzmetkeri vakına saldyrýy tıis nysandardyń keńeıtilgen tizimi shyqqan bolatyn. Olardyń qataryna bazarlar, sulýlyq salondary, dámhanalar, meıramhanalar, qyzmet kórsetý nysandary jáne jappaı baratyn basqa da oryndar kiredi.
"Adyrna" ulttyq portaly.
