اقتوبە قالاسىندا العاش رەت وبلىستىق مامانداندىرىلعان اۋدانارالىق اكىمشىلىك سوت اشىلدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
اكىمشىلىك سوت مەملەكەتتىك قىزمەت كورسەتۋدىڭ بارلىق زاماناۋي ستاندارتتارىن ەسكەرە وتىرىپ، تەحنولوگيالىق ينفراقۇرىلىممەن جابدىقتالعان. وندا اقپارات ورتالىعى، كىرىس كەڭسەسى جانە وزىنە-ءوزى قىزمەت كورسەتۋ ورتالىعىنان تۇراتىن فرونت-كەڭسە جۇمىس جاسايدى. سونىمەن قاتار مۇندا مەدياتورلار، ادۆوكاتتار مەن پروكۋرورلارعا ارنالعان جەكە كابينەتتەر دە بار.
اكىمشىلىك سوتتىڭ اشىلۋىنا قاتىسقان اقتوبە وبلىسىنىڭ اكىمى وڭداسىن ورازالين «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدىڭ ماڭىزدىلىعىنا توقتالدى.
— وزدەرىڭىزگە بەلگىلى، مەملەكەت باسشىسى قاسىم-جومارت توقاەۆ «حالىق ۇنىنە قۇلاق اساتىن مەملەكەت» كونتسەپتسياسىن جۇزەگە اسىرۋ ماقساتىندا ءبىرىنشى كەزەكتە ازاماتتاردىڭ وتىنىشتەرىن زاڭ اياسىندا ساپالى قاراۋ ماسەلەسىن قولعا الۋدى تاپسىرعان بولاتىن. وسىعان وراي زاڭناما جوباسى ازىرلەندى جانە قازاقستان رەسپۋبليكاسىنىڭ اكىمشىلىك راسىمدىك-پروتسەستىك كودەكسى قابىلدانىپ، بيىلعى جىلدىڭ 1 شىلدەسىنەن باستاپ قولدانىسقا ەنگىزىلىپ وتىر.بۇگىندە ءوتىنىش ءبىلدىرۋ ءتارتىبىن جەڭىلدەتۋ ءۇشىن جانە باقىلاۋدى جاقسارتۋعا ارنالعان «ە-ءوتىنىش» اقپاراتتىق جۇيەسى ىسكە قوسىلدى. وسى جۇيەمەن جۇمىس جاساۋ ءۇشىن ەكى اي ىشىندە جەرگىلىكتى اتقارۋشى ورگانداردىڭ 2439 قىزمەتكەرى وقىتۋدان ءوتتى. سونداي-اق ءوتىنىش بەرۋشىلەر ءۇشىن قولايلى جاعداي جاساۋ ماقساتىندا حالىققا قىزمەت كورسەتۋ ورتالىقتارىنىڭ بازاسىندا 16 فرونت كەڭسە جۇمىسىن باستادى، — دەگەن وبلىس اكىمى جاڭا اكىمشىلىك كودەكستىڭ مەملەكەتتىك ورگاندار ازاماتتاردىڭ وتىنىشتەرىن ءتيىمدى، ۋاقىتىلى جانە ساپالى قاراۋىنا ىقپال ەتەتىنىنە سەنىم ءبىلدىردى.
سالتاناتتى شارادا اقتوبە وبلىستىق سوتىنىڭ توراعاسى اسلامبەك مەرعاليەۆ اكىمشىلىك سوت جاريا-قۇقىقتىق قاتىناستاردان تۋىندايتىن، ياعني مەملەكەتتىك ورگاندار، ازاماتتار مەن زاڭدى تۇلعالار اراسىنداعى داۋلاردى شەشۋگە باعىتتالعانىن، مامانداندىرىلعان اكىمشىلىك سوت 1 شىلدەدەن باستاپ قولدانىسقا ەنگىزىلگەن زاڭ اياسىندا جۇمىس جاسايتىنىن جەتكىزدى.
"ادىرنا" ۇلتتىق پورتالى.
