قازاقستاندا 1 شىلدەدەن باستاپ اكىمشىلىك راسىمدىك-پروتسەسسۋالدى كودەكس كۇشىنە ەنەدى. جاڭا قۇجات مەملەكەتتىك ورگاندارمەن داۋ-دامايدا قاراپايىم حالىقتىڭ قۇقىعىن قورعاۋعا باعىتتالعان، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
ادىلەت ۆيتسە-ءمينيسترى ناتاليا پاننىڭ ايتۋىنشا، جاڭا كودەكس ازاماتتاردى بيلىك ورگاندارىنىڭ زاڭسىز ارەكەتتەرىنەن قورعاۋعا ءتيىس. ماسەلەن، قۇقىقتىق شەشىمدەردىڭ كۇشىن جويۋدىڭ ەرەكشە ءتارتىبى ەنگىزىلەدى. قازاقستاندىق ءبىر كەزدەرى قابىلدانعان شەشىم زاڭدى، دايەكتى جانە ونىڭ كۇشىن جويۋعا بولمايتىنىنا سەنىمدى بولۋى كەرەك.
«ازاماتقا الەۋمەتتىك كومەك تولەندى دەلىك. الايدا ءبىراز ۋاقىتتان كەيىن تەكسەرىس كەزىندە جاردەماقى ارتىق تولەنىپ قويعانى، مەملەكەتتىك ورگاننىڭ كىناسىنەن قاتە شەشىم قابىلدانعانى انىقتالدى. مۇنداي جاعدايدا وكىلەتتى ورگان ادال ازاماتتان جۇمسالعان اقشانى قايتارۋدى تالاپ ەتە المايدى. ويتكەنى ول ادامنىڭ ەش كىناسى جوق»، - دەدى پان.
تاعى جاڭاشىلدىق – قۇقىق باسىمدىعى قاعيداتىنىڭ ەنگىزىلۋى. ول بويىنشا زاڭنامانىڭ كۇماندى جانە تۇسىنىكسىز تۇستارى، قايشىلىقتارى قاراپايىم ازاماتتاردىڭ پايداسىنا شەشىلەدى.
«مىسالى، مەملەكەتتىك قىزمەت كورسەتۋ ءتارتىبىن رەتتەيتىن قۇجاتتا مەرزىم ءۇش كۇن دەپ بەلگىلەنگەن. بىراق ول مەرزىم جۇمىس نەمەسە كۇنتىزبە كۇندەرىمەن سانالا ما، ول كورسەتىلمەگەن. وسى جاعدايدا سىزگە مەملەكەتتىك قىزمەت ءۇش كۇنتىزبەلىك كۇن ىشىندە كورسەتىلۋگە ءتيىس. ويتكەنى بۇل ازاماتقا الدەقايدا ىڭعايلى»، - دەدى پان بەيسەنبىدە وتكەن ءباسپاسوز ءماسليحاتىندا.
جوعارعى سوتتىڭ اكىمشىلىك ىستەر جونىندەگى سوت القاسىنىڭ توراعاسى قانات مۋسين جاڭا كودەكستىڭ نورمالارى قاي ۋاقىتتا قولدانىلاتىنىن ءتۇسىندىردى. مىسالى، اكىمدىك جەر بەرۋدەن باس تارتىپ، ازامات مۇنىمەن كەلىسپەي، تالاپ-ارىز تۇسىرسە، ءىس جاڭا كودەكسپەن قارالادى.
«سوت بۇل داۋدى جاڭا كودەكستىڭ ەرەجەلەرى بويىنشا قارايدى. 1 شىلدەگە دەيىن مۇنداي ىستەر ازاماتتىق سوت وندىرىسىندە قارالىپ كەلدى. ول تاراپتاردىڭ تەڭ بولۋىن تالاپ ەتەتىن. الايدا جاي ادام مەن بيلىك ورگانىن سالىستىرۋعا بولمايدى. مەملەكەتتىك ورگاننىڭ ساراپشىلارى، زاڭگەرلەرى بار. سول سەبەپتى ەكى تاراپتىڭ مۇمكىندىكتەرى ءارتۇرلى»، - دەدى مۋسين.
بۇعان قوسا جاڭا كودەكس مەملەكەتتىك ورگانداردى تارتىپكە ۇيرەتۋگە ءتيىس، مىسالى، اقشا ءوندىرىپ الۋ جولىمەن.
«قازىر قالاي؟ مەملەكەتتىك ورگاننىڭ وكىلى سوتقا بارماي قويادى. ال سوت ءىستى قاراپ، شەشىمدى مەملەكەتتىك ورگاننىڭ پايداسىنا شىعارۋى مۇمكىن. ال ەندى جاڭا تالاپ بويىنشا، ەگەر ول سوتقا كەلمەسە نەمەسە قۇجاتتاردى ۇسىنباسا، سوت ودان 20 اەك (58 340 تەڭگە – Sputnik) ءوندىرىپ الادى. اقشا ءوندىرىپ الۋ سوتتىڭ تالابى ورىندالعانعا دەيىن بىرنەشە رەت قولدانىلۋى مۇمكىن»، - دەدى مۋسين.
"ادىرنا" ۇلتتىق پورتالى
