ەل تاۋەلسىزدىگىنىڭ 30 جىلدىعى مەن بۇقارالىق اقپارات قۇرالدارى قىزمەتكەرلەرىنىڭ ءتول مەرەكەسىنە وراي «ماڭعىستاۋ مەديا» جشس-ءنىڭ جاڭا ساۋلەتتى عيماراتى سالتاناتتى تۇردە اشىلدى.
سالتاناتتى جيىنعا ماڭعىستاۋ وبلىسى اكىمىنىڭ ورىنباسارى گۇلميرا قالمۇراتوۆا، مو ىشكى ساياسات باسقارماسىنىڭ باسشىسى امانعالي نۇرداۋلەتوۆ، وبلىستىڭ ارداگەر جۋرناليستەرى مەيرامباي قيباسوۆ، ايتۋار وتەگەنوۆ، پەتر دولماتوۆ، ليۋدميلا پەتريششەنكو، ءازىربايجان قونارباەۆ سىندى بەلگىلى جۋرناليستەر قاتىستى. عيماراتتىڭ لەنتاسىن قيۋ ءراسىمىن «ماڭعىستاۋ مەديا» جشس ديرەكتورى ايسۇلۋ دۋتباەۆا وبلىس اكىمىنىڭ ورىنباسارى گۇلميرا قالمۇراتوۆا مەن ولكەنىڭ ارداگەر ءجۋرناليسى مەيرامباي قيباسوۆقا تابىستادى.
جيىندى اشقان ماڭعىستاۋ وبلىسى اكىمىنىڭ ورىنباسارى گۇلميرا قالمۇراتوۆا وبلىس اكىمى سەرىكباي ترۇموۆتىڭ قۇتتىقتاۋىن جەتكىزىپ، «ماڭعىستاۋ مەديا» جۋرناليستەرىن جاڭا عيماراتتارىمەن قۇتتىقتادى. سونىمەن قاتار، گۇلميرا قالمۇراتوۆا «ماڭعىستاۋ وبلىسىنىڭ بۇقارالىق اقپارات قۇرالدارى سالاسىنىڭ دامۋىنا قوسقان ۇلەسى ءۇشىن» بىرقاتار قىزمەتكەرلەرگە وبلىس اكىمىنىڭ العىس حاتىن تابىستادى.
«ماڭعىستاۋ» گازەتىنىڭ رەداكتورى قىزمەتىن اتقارعان ارداگەر جۋرناليست مەيرامباي قيباسوۆ باق وكىلدەرىن مەرەيلى مەرەكەسىمەن قۇتتىقتاپ، ولكە باسىلىمدارىنىڭ تاريحىنا توقتالدى.
«وسىنداي كەڭ ءزاۋلىم سارايدا جاس جۋرناليستەردىڭ شىعارماشىلىق ىزدەنىس پەن زور جىگەرمەن قىزمەت ەتۋىنە تىلەكتەسپىن. مەديا باسشىسى ايسۇلۋ قابىشقىزىنا ريزاشىلىعىمدى بىلدىرەمىن»، - دەدى م.قيباسوۆ.
ءوز كەزەگىندە ءسوز العان «ماڭعىستاۋ مەديا» جشس ديرەكتورى ايسۇلۋ دۋتباەۆا جۋرناليستەردى مەرەكەمەن قۇتتىقتاپ، جيىلعان كوپشىلىككە العىسىن ءبىلدىردى.
«وسى عيماراتتىڭ اشىلۋىنا ۇيىتقى بولعان وبلىس اكىمى سەرىكباي ترۇموۆقا، ەكى جىلعا جۋىق ۋاقىت «ماڭعىستاۋ مەديا» جشس ديرەكتورىنىڭ كەڭەسشىسى قىزمەتىن اتقارعان سەرىك ەڭسەگەنوۆكە العىسىمدى بىلدىرەمىن. سونىمەن قاتار وڭىردەگى بىرقاتار ازاماتتارعا العىسىمدى بىلدىرگىم كەلەدى. سىزدەردىڭ ارقالارىڭىزدا وسىنداي كەڭ، ءزاۋلىم عيماراتقا قولجەتكىزىپ وتىرمىز. ەندىگى ماقساتىم - جۋرناليستەردى باسپانامەن قامتاماسىز ەتۋ. وسى جولدا مەديانىڭ بۇرىنعى عيماراتىنىڭ ءبىرىن جۋرناليستەرگە باسپانا رەتىندە ۇسىنۋ جولىندا جۇمىستانىپ جاتىرمىن. ويتكەنى الەۋمەتتىك جاعىنان قامتۋ بۇل قىزمەتكەرلەردىڭ ەمىن-ەركىن، الاڭداماي ءوز قىزمەتىن اتقارۋىنا بىردەن-ءبىر اسەر ەتۋشى فاكتور دەپ ويلامىن. بارلىعىڭىزدى بۇگىنگى مەرەيلى مەرەكەمەن شىن جۇرەكتەن قۇتتىقتايمىن. دەندەرىڭىزگە ساۋلىق، وتباسىلارىڭىزعا اماندىق تىلەيمىن»، - دەدى مەديا باسشىسى.
مەرەكەلىك شارا Caspian Riviera قوناق ۇيىندەگى وبلىس اكىمىنىڭ جۋرناليستەرگە ارنالعان مەرەكەلىك جيىنىمەن جالعاستى. «ماڭعىستاۋ مەديا» باسشىسى ايسۇلۋ دۋتباەۆا وبلىس اكىمى سەرىكباي ترۇموۆقا ارنايى دايىندالعان مەديانىڭ بولمىسىن باياندايتىن «مەديا بۇرىشى» ارقىلى جۋرناليستيكا سالاسىنىڭ سان قىرلى قىزىعى مەن قيىندىعىمەن ءبولىستى.
"ادىرنا" ۇلتتىق پورتالى
