El Táýelsizdiginiń 30 jyldyǵy men Buqaralyq aqparat quraldary qyzmetkerleriniń tól merekesine oraı «Mańǵystaý Medıa» JShS-niń jańa sáýletti ǵımaraty saltanatty túrde ashyldy.
Saltanatty jıynǵa Mańǵystaý oblysy ákiminiń orynbasary Gúlmıra Qalmuratova, MO Ishki saıasat basqarmasynyń basshysy Amanǵalı Nurdáýletov, oblystyń ardager jýrnalısteri Meırambaı Qıbasov, Aıtýar Ótegenov, Petr Dolmatov, Lıýdmıla Petrıenko, Ázirbaıjan Qonarbaev syndy belgili jýrnalıster qatysty. Ǵımarattyń lentasyn qııý rásimin «Mańǵystaý Medıa» JShS dırektory Aısulý Dýtbaeva oblys ákiminiń orynbasary Gúlmıra Qalmuratova men ólkeniń ardager jýrnalısi Meırambaı Qıbasovqa tabystady.
Jıyndy ashqan Mańǵystaý oblysy ákiminiń orynbasary Gúlmıra Qalmuratova oblys ákimi Serikbaı Trumovtyń quttyqtaýyn jetkizip, «Mańǵystaý Medıa» jýrnalısterin jańa ǵımarattarymen quttyqtady. Sonymen qatar, Gúlmıra Qalmuratova «Mańǵystaý oblysynyń buqaralyq aqparat quraldary salasynyń damýyna qosqan úlesi úshin» birqatar qyzmetkerlerge oblys ákiminiń Alǵys hatyn tabystady.
«Mańǵystaý» gazetiniń redaktory qyzmetin atqarǵan ardager jýrnalıst Meırambaı Qıbasov BAQ ókilderin mereıli merekesimen quttyqtap, ólke basylymdarynyń tarıhyna toqtaldy.
«Osyndaı keń záýlim saraıda jas jýrnalısterdiń shyǵarmashylyq izdenis pen zor jigermen qyzmet etýine tilektespin. Medıa basshysy Aısulý Qabyshqyzyna rızashylyǵymdy bildiremin», - dedi M.Qıbasov.
Óz kezeginde sóz alǵan «Mańǵystaý Medıa» JShS dırektory Aısulý Dýtbaeva jýrnalısterdi merekemen quttyqtap, jıylǵan kópshilikke alǵysyn bildirdi.
«Osy ǵımarattyń ashylýyna uıytqy bolǵan oblys ákimi Serikbaı Trumovqa, eki jylǵa jýyq ýaqyt «Mańǵystaý Medıa» JShS dırektorynyń keńesshisi qyzmetin atqarǵan Serik Eńsegenovke alǵysymdy bildiremin. Sonymen qatar óńirdegi birqatar azamattarǵa alǵysymdy bildirgim keledi. Sizderdiń arqalaryńyzda osyndaı keń, záýlim ǵımaratqa qoljetkizip otyrmyz. Endigi maqsatym - jýrnalısterdi baspanamen qamtamasyz etý. Osy jolda medıanyń burynǵy ǵımaratynyń birin jýrnalısterge baspana retinde usyný jolynda jumystanyp jatyrmyn. Óıtkeni áleýmettik jaǵynan qamtý bul qyzmetkerlerdiń emin-erkin, alańdamaı óz qyzmetin atqarýyna birden-bir áser etýshi faktor dep oılamyn. Barlyǵyńyzdy búgingi mereıli merekemen shyn júrekten quttyqtaımyn. Denderińizge saýlyq, otbasylaryńyzǵa amandyq tileımin», - dedi Medıa basshysy.
Merekelik shara Caspian Riviera qonaq úıindegi oblys ákiminiń jýrnalısterge arnalǵan merekelik jıynymen jalǵasty. «Mańǵystaý Medıa» basshysy Aısulý Dýtbaeva oblys ákimi Serikbaı Trumovqa arnaıy daıyndalǵan Medıanyń bolmysyn baıandaıtyn «Medıa buryshy» arqyly jýrnalıstıka salasynyń san qyrly qyzyǵy men qıyndyǵymen bólisti.
"Adyrna" ulttyq portaly
