ساياساتتانۋشى: ورتا ازيادا قازاقستان اۋىل اكىمدەرىن سايلاۋدى ءبىرىنشى بولىپ قولعا الدى

953

ساياساتتانۋشى باۋىرجان سەرىكباەۆ بيىلعى وتەتىن اۋىلدىق دەڭگەيدەگى اكىمدەردى تىكەلەي سايلاۋعا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە جاساپ.

باۋىرجان سەرىكباەۆتىڭ ايتۋىنشا، قازاقستاندا 2300-دەن استام اۋىل اكىمى بار. 2023 جىلعا دەيىن بارلىعىن ءوز مەرزىمىنىڭ اياقتالۋىمەن حالىق سايلايتىن بولادى.

«بۇل تىكەلەي پرەزيدەن قاسىم-جومارت توقاەۆ مىرزانىڭ ساياسي رەفورماسىمەن ىسكە اسىپ جاتقان، ەلىمىزدە دەموكراتيالىق باسقارۋ پرينتسيپتەرىن ورنىقتىراتىن تاريحي قادام. ورتا ازيا ەلدەرىنىڭ ىشىندە قازاقستان اۋىل اكىمدەرىن سايلاۋدى ءبىرىنشى بولىپ قولعا الدى. مەملەكەت، قوعام ءۇشىن تاجىريبە، سىن ساعات بولاتىن ماڭىزدى ساياسي پروتسەسس»،- دەيدى ساياساتتانۋشى.

سونىمەن قاتار، ول سايلاۋدىڭ ەرەكشەلىگىنە توقتالدى.

« اۋىل اكىمىنە سالىقتىڭ 9 ساناتىنان تۇسكەتىن ءوز بيۋدجەتى بەرىلەدى. اكىمنىڭ بۇرىنعىداي اۋدان اكىمىنە جالتاقتاماي، ءوز بيۋدجەتىمەن اۋىلدىڭ ماسەلەسىن شەشە الاتىن مۇمكىندىگى بولادى. حالىق سايلايدى. اكىم تىكەلەي ءوز سايلاۋشىلارىنىڭ الدىندا جاۋاپتى بولاماق. حالىق سەنىمسىزدىك تانىتىپ، ۇناماعان اكىمدى كەرى قايتارىپ الا الادى. اكىم بولۋ ءۇشىن جاسى 25-كە تولعان، جوعارى ءبىلىمدى، مەملەكەتتىك قىزمەتتە ەڭبەك تاجىريبەسى بار نەمەسە اۋىل شارۋاشىلىعى سالاسىندا، جەكە سەكتوردا باسشىلىق قىزمەتتە بولعان ازاماتتار سايلانا الادى. اكىم 4 جىل مەرزىمگە سايلانادى. سونىمەن قاتار، كانديداتتار ءوزىن-ءوزى ۇسىنا الادى. ول ءۇشىن سايلاۋشىلاردىڭ 1% داۋسىن الۋى ءتيىس. تاعى ءبىر ايتا كەتەرلىگى، سايلاۋعا ساياسي پارتيالار اتىنان دا تۇسە الادى»،- دەيدى سپيكەر.

ونىڭ ايتۋىنشا، پرەزيدەنت ەلىمىزدەگى 90% اكىمدەردى حالىق سايلاۋى ءتيىس دەگەن تالاپ قويدى. 2024 جىلدان باستاپ اۋدان اكىمدەرىن سايلاۋعا كەلەمىز. ءبارى ءساتتى وتسە سول تاجىريبەمەن كەلەشەكتە ءىرى قالالار مەن وبلىس اكىمدەرىن دە حالىق سايلايتىن نۇكتەگە كەلۋىمىز ابدەن مۇمكىن.

«مەنىڭ ويىمشا پرەزيدەنت باستاعان بۇل رەفورما الداعى 4-5 جىلدا ناقتى ىسىمەن كورىنگەن جاڭا ساياسي ليدەرلەردى حالىق الدىنا الىپ شىعادى. مەملەكەتتىك باسقارۋدا پراكتيكالىق تاجىريبەسى، ناتيجەسى، جەتكەن جەتىستىگى بار زاماننىڭ جاڭا ليدەرلەرىن قالىپتاستىرادى. بۇل پروتسەسس الداعى 5-6 جىلدا قوعامدىق سانا مەن ساياسي مادەنيەتتى مۇلدەم باسقا ساتىعا كوتەرەتىن بولادى. حالىق ءسوزدىڭ ەمەس، ءىستىڭ ادامدارىن بىردەن تانيتىن دەڭگەيگە كەلەدى. سوعان قاراپ باعا بەرىلەدى. پرەزيدەنت باستاعان اۋىل اكىمدەرىن سايلاۋ رەفورماسى ەلىمىزدى ساتىلاپ وزگەرەتىن، دەموكراتيا پرينتسيپتەرىن مىقتاپ ورناتاتىن، ەڭ باستىسى قازاقستاندى سانالى، وركەنيەتتى دەموكراتياعا باستايتىن بىردەن ءبىر جول بولادى. رەاليزم سولاي. سوعان كەلە جاتىرمىز»،-دەيدى ول.

پىكىرلەر
رەداكتسيا تاڭداۋى