ۇلتتىق بىرىڭعاي تەستىلەۋدىڭ قورىتىندىسى بويىنشا بيىل ەلىمىزدە مەكتەپ بىتىرگەن ءاربىر 16-شى تۇلەك "التىن بەلگى" يەگەرى بولىپ وتىر دەپ حابارلايدى "ادىرنا" ۇلتتىق پورتالى "ەۋرازيا" ءبىرىنشى ارناسىنا سىلتەمە جاساپ.
بيىل جالپى 156 مىڭنان استام وقۋشى مەكتەپ بىتىرگەن. ونىڭ ىشىندە 8500-دەن اسا تۇلەك ۇزدىك اتتەستات، 9746 تۇلەك "التىن بەلگى" العان.
«بيىل 9746 تۇلەك "التىن بەلگى" يەگەرى بولدى. بۇل وتكەن جىلمەن سالىستىرعاندا جوعارى كورسەتكىش»، — دەيدى ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتى توراعاسىنىڭ ورىنباسارى جومارت قارامباەۆ.
سونىمەن "التىن بەلگى" العاندار سانى بويىنشا ۇزدىك وڭىرلەر - تۇركىستان، الماتى جانە شىعىس قازاقستان وبلىستارى.
"التىن بەلگى" العاندار، ارينە، قۋانىشتى. دەگەنمەن بىرقاتار مۇعالىمدەر بيىل مۇنداي كورسەتكىشكە جەتۋدىڭ ارعى جاعىندا ناقتى ءبىلىم ساپاسى بار دەگەنگە كەلىسپەيدى.
«التىن مەدالدىڭ كوپ بولۋى ءبىلىم ساپاسىنىڭ كورسەتكىشى دەپ ايتا الماس ەدىم، — دەيدى تاريح ءپانىنىڭ مۇعالىمى ومىربەك شىنىبەكۇلى. — سەبەبى جەمقورلىق دەندەپ بارادى. بارماق باستى، كوز قىستى دەگەن سەكىلدى. ودان بولەك ىندەت تاعى ءبىر-ەكى جىلعا سوزىلاتىن بولسا، ونلاين وقۋ ءبىلىم ساپاسىن ءبىرجولا كۇيرەتىپ تىناتىن شىعار دەگەن قاۋىپ بار».
"ادىرنا" ۇلتتىق پورتالى.
