ۇلتتىق ەكونوميكا ءمينيسترى اسەت ەرعاليەۆ حالىقتىڭ تابىسىنىڭ ءوسۋى ەل ەكونوميكاسىنىڭ دامۋىنا تىكەلەي بايلانىستى ەكەنىن مالىمدەدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا جۋرناليستەر مينيستردەن قازاقستاندىقتاردىڭ تابىسى نەگە وسپەيتىنىن سۇرادى.
اسەت ەرعاليەۆ ۇكىمەت حالىقتىڭ ناقتى تابىسىن ارتتىرۋ جۇمىسىمەن تۇراقتى تۇردە اينالىساتىنىن اتاپ ءوتتى.
«بۇل كەشەندى ماسەلە. بۇل جەردە قىسقامەرزىمدى جانە ۇزاقمەرزىمدى قۇرالدار بار. ەگەر ءبىز تابىستىڭ تۇراقتى ءوسۋى تۋرالى ايتساق، جالعىز جول – ۇزاقمەرزىمدى قۇرالدار. بۇل ەكونوميكانى ءارتاراپتاندىرۋ، قۇرىلىمدىق رەفورمالار جۇرگىزۋ، ساپالى جۇمىس ورىندارىن قۇرۋ»، - دەدى ول.
وسىدان كەيىن مينيستر قىسقامەرزىمدى قۇرالدارعا توقتالدى. ول ەڭ تومەنگى جالاقىنىڭ كوبەيگەنىن، دارىگەرلەردىڭ، مۇعالىمدەردىڭ، باسقا قىزمەتكەرلەردىڭ جالاقىسى وسكەنىن ايتتى.
«تابىستى ارتتىرۋمەن بايلانىستى ماسەلە، ەگەر ءبىز ونىڭ جۇيەلى شەشىلۋى تۋرالى ايتساق، ول ەكونوميكانىڭ دامۋى. ەكونوميكا دامىسا، جۇمىس ورىندارى بولسا، تابىس وسەدى. حالىقتىڭ تابىسىن وسىرۋمەن بايلانىستى ماسەلەلەر ەكونوميكانىڭ دامۋىنا تىكەلەي بايلانىستى»، - دەپ جاۋاپ بەردى ۆەدومستۆو باسشىسى.
"ادىرنا" ۇلتتىق پورتالى
