Ulttyq ekonomıka mınıstri Áset Erǵalıev halyqtyń tabysynyń ósýi el ekonomıkasynyń damýyna tikeleı baılanysty ekenin málimdedi, dep habarlaıdy «Adyrna» ulttyq portaly Sputnik Qazaqstan saıtyna silteme jasap.
Ortalyq kommýnıkaııalar qyzmetinde ótken baspasóz máslıhatynda jýrnalıster mınıstrden qazaqstandyqtardyń tabysy nege óspeıtinin surady.
Áset Erǵalıev úkimet halyqtyń naqty tabysyn arttyrý jumysymen turaqty túrde aınalysatynyn atap ótti.
«Bul keshendi másele. Bul jerde qysqamerzimdi jáne uzaqmerzimdi quraldar bar. Eger biz tabystyń turaqty ósýi týraly aıtsaq, jalǵyz jol – uzaqmerzimdi quraldar. Bul ekonomıkany ártaraptandyrý, qurylymdyq reformalar júrgizý, sapaly jumys oryndaryn qurý», - dedi ol.
Osydan keıin mınıstr qysqamerzimdi quraldarǵa toqtaldy. Ol eń tómengi jalaqynyń kóbeıgenin, dárigerlerdiń, muǵalimderdiń, basqa qyzmetkerlerdiń jalaqysy óskenin aıtty.
«Tabysty arttyrýmen baılanysty másele, eger biz onyń júıeli sheshilýi týraly aıtsaq, ol ekonomıkanyń damýy. Ekonomıka damysa, jumys oryndary bolsa, tabys ósedi. Halyqtyń tabysyn ósirýmen baılanysty máseleler ekonomıkanyń damýyna tikeleı baılanysty», - dep jaýap berdi vedomstvo basshysy.
"Adyrna" ulttyq portaly
