دۇنيەجۇزىلىك دەنساۋلىق ساقتاۋ ۇيىمى جاسوسپىرىمدەرگە COVID-19-عا قارسى ۆاكتسينا سالۋ مۇمكىندىگى تۋرالى ايتتى، دەپ حابارلايدى “ادىرنا” ۇلتتىق پورتالى Sputnik.kz سايتىنا سىلتەمە جاساپ.
ۇيىمنىڭ مالىمدەمەسىندە ايتىلعانداي، COVID-19-عا قارسى ۆاكتسينالار 18 جاستان جوعارى ادامداردىڭ كوبىسى ءۇشىن، سونىڭ ىشىندە اۋتويممۋندىق اۋىتقۋلاردى قوسقاندا، كەز كەلگەن ءتيپتى اۋرۋى بار ادامدار ءۇشىن قاۋىپسىز.
مۇنداي جاعدايلارعا گيپەرتونيا، ديابەت، استما، وكپە، باۋىر جانە بۇيرەك اۋرۋلارى، سونداي-اق باقىلاناتىن كەيبىر سوزىلمالى ينفەكتسيالار كىرەدى.
"ادەتتە بالالار مەن جاسوسپىرىمدەر ەرەسەكتەرگە قاراعاندا كوروناۆيرۋستىڭ جەڭىل تۇرىمەن اۋىرادى. سول سەبەپتى ەگەر ولار COVID-19-دىڭ اۋىر تۇرىنە شالدىعاتىندار توبىنا جاتپاسا، ولارعا ۆاكتسينا سالۋعا اسىقپاعان ءجون. ەڭ الدىمەن ەگدە جاستاعى، سوزىلمالى اۋرۋى بار ادامدار مەن مەديتسينا قىزمەتكەرلەرىن ۆاكتسينالاۋ قاجەت", - دەپ اتاپ ءوتتى ددسۇ.
تاعى وقىڭىز: بارلىق قازاقستاندىق ۆاكتسينا سالدىرۋعا مىندەتتەلە مە - ۇكىمەت جاۋابى
ۇيىم بالالاردى ۆاكتسينالاۋعا قاتىستى جالپى ۇسىنىمدار بەرۋ ءۇشىن COVID-19-عا قارسى ءتۇرلى ۆاكتسينالاردى قوسىمشا زەرتتەۋ قاجەت دەپ سانايدى.
"ددسۇ ساراپشىلارىنىڭ ستراتەگيالىق كونسۋلتاتيۆتىك توبى (SAGE) Pfizer / BionTech ۆاكتسيناسىن 12 جاستان باستاپ پايدالانۋعا بولادى دەگەن پايىمعا كەلدى. تاۋەكەلى جوعارى توپقا جاتاتىن 12-دەن 15 جاسقا دەيىنگى بالالارعا بۇل ۆاكتسينا باسقا باسىم توپتاعىلارمەن بىرگە ۇسىنىلادى", - دەلىنگەن حابارلامادا.
ۆاكتسينانىڭ بالالارعا اسەرىن انىقتاۋ جۇمىستارى جالعاسۋدا جانە ددسۇ سونىڭ قورىتىندىسىنا قاراي ءوز ۇسىنىمدارىن جاڭارتادى.
