ماحامبەت دوسمۇحامبەتوۆ پاراۆولەيبولشىلارمەن كەزدەستى

1916
Adyrna.kz Telegram

اتىراۋ وبلىسىنىڭ اكىمى ماحامبەت دوسمۇحامبەتوۆ جاقىندا عانا گەرمانيا ەلىندە وتكەن ليتسەنزيالىق تۋرنيردە كۇمىس جۇلدەگە يە بولعان پاراۆولەيبولشىلارمەن كەزدەستى.

الدىمەن سپورتشىلاردىڭ دايىندىق بارىسىن كورگەن ءوڭىر باسشىسى، حالىقارالىق جارىستان جۇلدەلى ورالعان پاراۆولەيبولشىلاردى جەڭىستەرىمەن قۇتتىقتادى.

“سىزدەردىڭ سپورتقا دەگەن قۇشتارلىقتارىڭىز بارشا تۇرعىندارعا، اسىرەسە، جاستارعا ۇلگى. ەلىمىزدە وسىنداي ەرجۇرەك تە، قايتپاس-قايسار كوماندا بار ەكەنىن ماقتان تۇتامىز. الدا ءالى تالاي بەلەستەردى باعىندىراتىندارىڭىز ءسوزسىز. بۇگىن كۇمىس جۇلدە ەنشىلەسەڭىزدەر، الدا التىننان القا تاعىناتىندارىڭىزعا سەنەمىن”، - دەدى وبلىس اكىمى.

توقسان پايىزى اتىراۋ وبلىسىنىڭ سپورتشىلارىنان قۇرالعان پاراۆولەيبولدان ۇلتتىق قۇراما 1-5 ماۋسىمدا گەرمانيادا وتكەن حالىقارالىق پاراليمپياداعا ىرىكتەۋ تۋرنيرىنە قاتىسقان بولاتىن. بەس ويىن وتكىزىپ، فينالعا شىققان. اقتىق سايىستا نەمىستەردىڭ قۇراماسىنا 3-1 ەسەبىمەن ەسە جىبەرىپ، كۇمىس مەدالعا يە بولدى.

«بۇل سپورت تۇرىنەن الەم بويىنشا 72 ەلدىڭ كومانداسى بار. ءبىز سولاردىڭ الدىڭعى قاتارىندا كەلەمىز. قۇرامامىز كوپتەگەن سايىستاردا وزدەرىنىڭ مىقتىلىقتارىن دالەلدەپ ءجۇر. ايتالىق، سپورتشىلار قازاقستان رەسپۋبليكاسىنىڭ 11 دۇركىن چەمپيونى، وعان قوسا الەم چەمپيوناتىندا، ازيا جانە مۇحيتارالىق چەمپيوناتتاردا جۇلدەلى ورىندارعا يە بولدى. جىگىتتەر ءالى دە جوعارى جەتىستىكتەرگە جەتەرى ءسوزسىز. سپورتشىلارىمىز بابىندا، الداعى جارىستاردا پاراليمپياداعا ليتسەنزيا الۋعا مۇمكىندىگىمىز بار»،- دەدى پاراۆولەيبولدان قر ۇلتتىق قۇراماسىنىڭ باس جاتتىقتىرۋشى باۋىرجان تاحاۋوۆ.

كوماندامەن اشىق اڭگىمە بارىسىندا سپورتشىلار ءوز ماسەلەلەرىن دە ورتاعا سالدى. وبلىس اكىمى ءتيىستى سالا باسشىلارىنا تاپسىرما بەرىلىپ، شەشىمدەر قاراستىرىلاتىنىن جەتكىزدى.

سونداي-اق، ايماق باسشىسى ماحامبەت دوسمۇحامبەتوۆ ەلىمىزدىڭ كوك تۋىن جەلبىرەتىپ كەلگەن سپورتشىلارعا الداعى سايىستارعا ساتتىلىك تىلەي وتىرىپ، العىس حاتتار تابىس ەتتى. ال سپورتشىلار ءوز كەزەگىندە ءوڭىر باسشىسىنا حالىقارالىق تۋرنيردەن اكەلگەن ەستەلىك دوپتى ۇسىندى.

ايتا كەتۋ كەرەك، اتىراۋ وبلىسىندا پاراۆولەيبول 2002 جىلى قۇرىلعان بولاتىن.

پىكىرلەر