ءوڭىر باسشىسى وبلىستىق دەنساۋلىق ساقتاۋ باسقارماسىنا قاراستى مامانداندىرىلعان بالالار ءۇيى تاربيەلەنۋشىلەرىن 1-ماۋسىم حالىقارالىق بالالاردى قورعاۋ كۇنى مەرەكەسىمەن قۇتتىقتادى.
ورتالىقتاعى ەكى بالانىڭ تۇساۋىن كەسىپ، ومىردە ءاردايىم جولدارى اشىق بولۋىن تىلەدى. ولاردىڭ ءبىرى — اتا-اناسىنىڭ قامقورلىعىنسىز قالعان تاستاندى بالا بولسا، ەكىنشىسىن — مۇمكىندىگى شەكتەۋلى اناسى باعۋعا جاعدايى كەلمەگەندىكتەن ورتالىققا ۋاقىتشا تاپسىرعان.
وبلىس اكىمى ماحامبەت دوسمۇحامبەتوۆ «كوپشىلىگى تۋعانىنان انا مەيىرىمىن كورمەي ءوسىپ كەلە جاتقان بۇل بالالاردىڭ ماحاببات پەن قامقورلىققا وتە ءزارۋ ەكەنىن بىلەمىز. سوندىقتان دا بۇلدىرشىندەرىمىز كوپ ۇزاماي جاقسى وتباسىدان جايلى ورىن تاۋىپ، تۋعان ەلدىڭ لايىقتى ازاماتتارى بولىپ ءوسسىن. بۇگىن عانا ەمەس، بالالارىمىزعا ءار كۇنى مەرەكەلىك كوڭىل-كۇي سىيلاپ، جاعداي جاساۋىمىز كەرەك»،-دەگەن تىلەگىن ءبىلدىردى. ودان كەيىن ايماق باسشىسى بۇلدىرشىندەر ءوز ونەرىن ورتاعا سالعان «ءبىز ءومىردىڭ گۇلىمىز» اتتى كونتسەرتتىك ءىس-شارانىڭ بىرنەشە ءنومىرىن تاماشالادى.
بالالاردىڭ قانداي جاعدايدا تۇرىپ جاتقانىمەن تانىسىپ، الەۋمەتتىك مەكەمەنىڭ باسشىلىعىمەن اڭگىمەلەستى. الەۋمەتتىك مەكەمەنىڭ باسشىسى رايسا بايمۇحانوۆانىڭ سوزىنشە، قازىرگى كەزدە مۇندا ءتۇرلى اۋرۋعا شالدىققان، 4 جاسقا دەيىنگى 23 ءبۇلدىرشىن تاربيە الۋدا. بالالار ورتالىق نەرۆ جۇيەسىنىڭ زاقىمدانۋى، سويلەۋ ءتىلى دامۋىنىڭ تەجەلۋى جانە دتسپ اۋرۋلارىمەن اۋىرادى.
ال الەۋمەتتىك مەكەمەنىڭ 50 قىزمەتكەرى سابيلەردى ساپالى جانە ۋاقتىلى كۇتىم-باعىممەن قامتاماسىز ەتىپ وتىر. «بۇل مەرەكە ۇرپاقتىڭ جان-جاقتى دامۋىنا جاۋاپ بەرەتىن قىزمەتكەرلەر ءۇشىن دە وتە ماڭىزدى. باقىتتى جانە تاۋەلسىز ەلىمىزدىڭ ماقتانىشىنا اينالا الاتىن ۇرپاق تاربيەلەۋ سىندى زور جاۋاپكەرشىلىكتى جەتە سەزىنەتىندەرىڭىزگە سەنەمىن. وسى باعىتتاعى ەرەن ەڭبەكتەرىڭىز ءۇشىن ارقايسىڭىزعا ارنايى العىسىمدى بىلدەرمىن»،-دەپ ايماق باسشىسى الەۋمەتتىك مەكەمەنىڭ قىزمەتكەرلەرىنە دە ريزاشىلىعىن ءبىلدىردى.
بالالار مەرەكەسىنە وراي تاربيەلەنۋشى بۇلدىرشىندەرگە وبلىس اكىمى اتىنان سىيلىقتار بەرىلدى.
سوڭعى جىلى مامانداندىرىلعان بالالار ءۇيىنىڭ ءبىر تاربيەلەنۋشىسىن وتباسى اسىراپ السا، التاۋى وزدەرىنىڭ تۋعان ۇيلەرىنە ورالعان، ءبىر بالا وتباسىلىق ۇلگىدەگى "شاڭىراك" بالالار اۋىلىنا اۋىستىرىلدى.
