Óńir basshysy oblystyq densaýlyq saqtaý basqarmasyna qarasty mamandandyrylǵan balalar úıi tárbıelenýshilerin 1-maýsym halyqaralyq balalardy qorǵaý kúni merekesimen quttyqtady.
Ortalyqtaǵy eki balanyń tusaýyn kesip, ómirde árdaıym joldary ashyq bolýyn tiledi. Olardyń biri — ata-anasynyń qamqorlyǵynsyz qalǵan tastandy bala bolsa, ekinshisin — múmkindigi shekteýli anasy baǵýǵa jaǵdaıy kelmegendikten ortalyqqa ýaqytsha tapsyrǵan.
Oblys ákimi Mahambet Dosmuhambetov «Kópshiligi týǵanynan ana meıirimin kórmeı ósip kele jatqan bul balalardyń mahabbat pen qamqorlyqqa óte zárý ekenin bilemiz. Sondyqtan da búldirshinderimiz kóp uzamaı jaqsy otbasydan jaıly oryn taýyp, týǵan eldiń laıyqty azamattary bolyp óssin. Búgin ǵana emes, balalarymyzǵa ár kúni merekelik kóńil-kúı syılap, jaǵdaı jasaýymyz kerek»,-degen tilegin bildirdi. Odan keıin aımaq basshysy búldirshinder óz ónerin ortaǵa salǵan «Biz ómirdiń gúlimiz» atty konerttik is-sharanyń birneshe nómirin tamashalady.
Balalardyń qandaı jaǵdaıda turyp jatqanymen tanysyp, áleýmettik mekemeniń basshylyǵymen áńgimelesti. Áleýmettik mekemeniń basshysy Raısa Baımuhanovanyń sózinshe, qazirgi kezde munda túrli aýrýǵa shaldyqqan, 4 jasqa deıingi 23 búldirshin tárbıe alýda. Balalar ortalyq nerv júıesiniń zaqymdanýy, sóıleý tili damýynyń tejelýi jáne DP aýrýlarymen aýyrady.
Al áleýmettik mekemeniń 50 qyzmetkeri sábılerdi sapaly jáne ýaqtyly kútim-baǵymmen qamtamasyz etip otyr. «Bul mereke urpaqtyń jan-jaqty damýyna jaýap beretin qyzmetkerler úshin de óte mańyzdy. Baqytty jáne Táýelsiz elimizdiń maqtanyshyna aınala alatyn urpaq tárbıeleý syndy zor jaýapkershilikti jete sezinetinderińizge senemin. Osy baǵyttaǵy eren eńbekterińiz úshin árqaısyńyzǵa arnaıy alǵysymdy bildermin»,-dep aımaq basshysy áleýmettik mekemeniń qyzmetkerlerine de rızashylyǵyn bildirdi.
Balalar merekesine oraı tárbıelenýshi búldirshinderge oblys ákimi atynan syılyqtar berildi.
Sońǵy jyly mamandandyrylǵan balalar úıiniń bir tárbıelenýshisin otbasy asyrap alsa, altaýy ózderiniń týǵan úılerine oralǵan, bir bala otbasylyq úlgidegi "Shańyrak" balalar aýylyna aýystyryldy.
