بۇل تۋرالى سىبايلاس جەمقورلىققا قارسى كۇرەس جونىندەگى وڭىرلىك كوميسسيا وتىرىسىندا بەلگىلى بولدى.
ايماق باسشىسى جەتەكشىلىك ەتكەن جيىنعا وبلىس اكىمىنىڭ ورىنباسارلارى، قۇقىق قورعاۋ سالاسىنىڭ باسشىلارى، سەلەكتورلىق رەجيمدە اۋدان اكىمدەرى قاتىستى.
كۇن تارتىبىندە «لاۋازىمدىق وكiلەتتiكتەردى تەرىس پايدالانۋ» جانە «پارا بەرۋ» سىبايلاس جەمقورلىق قىلمىستاردىڭ ءوسۋ ماسەلەسى مەن مونيتورينگ ناتيجەلەرى قارالدى.
سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتىنىڭ باسشىسى قانات سۇلەيمەنوۆ بۇگىنگى تاڭداعى جەمقورلىق قىلمىسىنىڭ كورسەتكىشىنە توقتالدى.
«ەگەر 2020 جىلى وبلىستا جەمقورلىق دەڭگەيى 12% تومەندەسە، ال اعىمداعى جىلدىڭ 1 توقسانىندا 41% تومەندەدى»،-دەگەن ق.سۇلەيمەنوۆ، دەگەنمەن قۇقىقتىق ستاتيستيكادا پاراقورلىق جانە لاۋازىمدىق وكىلەتتىگىن تەرىس پايدالانۋ فاكتىسىنىڭ ءوسۋ تەندەنتسياسى جالعاسۋدا ەكەنىن اتاپ ءوتتى.
سونداي-اق، دەپارتامەنت باسشىسى بۇل باعىتتا ىشكى ىستەر ورگانى جۇيەسىندە پارا الۋ فاكتىلەرىنىڭ ءجيى كەزدەسەتىنىن جەتكىزدى. وسى نەگىزدە وتكەن جىلى 8 قىلمىس انىقتالعان.
سونىمەن قاتار، ماحامبەت اۋدانىندا جەمقورلىققا قاتىستى 6 فاكت ورىن السا، جىلىويدا ءبىلىم سالاسى بويىنشا 3 فاكت تىركەلگەن.
ءوڭىر باسشىسى ماحامبەت دوسمۇحامبەتوۆ اۋدان اكىمدەرىنە ءوز اۋماقتارىنداعى احۋالدى باقىلاۋدا ۇستاۋدى تاپسىردى.
وعان قوسا جيىندا مەملەكەتتىك ساتىپ الۋ سالاسىنداعى نەگىزگى سىبايلاس جەمقورلىق تاۋەكەلدەردىڭ ءبىرى - تاۋارلار مەن قىزمەتتەر باعاسىن نەگىزسىز ءوسىرۋ بولىپ تابىلاتىنى ايتىلدى.
«2020 جىلى ساتىپ الۋ سالاسىندا باعالاردى اسىرا ءوسىرۋ فاكتىسى بويىنشا 31 بۇزۋشىلىق انىقتالدى. ەنگىزىلگەن ۇسىنىستار نەگىزىندە بيۋدجەتتىڭ 364 ملن.تەڭگە قارجىسى ۇنەمدەلدى.
مونيتورينگ جۇرگىزۋ بارىسىندا زاڭ بۇزۋشىلىقتار كوبىنەسە دەنساۋلىق ساقتاۋ جانە ءبىلىم بەرۋ سالالارىندا ءجيى ورىن الاتىندىعىن كورسەتتى»،- دەدى سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ايدوس مامىت.
ال، «اتىراۋ-ادالدىق الاڭى» جوبالىق كەڭسەسىنىڭ جەتەكشىسى الفيا اديەۆانىڭ ايتۋىنشا، بيىل 32 تۇرعىننان رەسمي تۇردە، ال رەسمي ەمەس تۇرعىدا 52 ارىز شاعىم كەلىپ تۇسكەن. 84 شاعىمنىڭ 13 ءبىلىم بەرۋ سالاسىنا، 19 دەنساۋلىق ساقتاۋ سالاسىنا، 18 ازىق-تۇلىك باعالارىنىڭ تۇراقسىزدىعىنا، 20-سى ءدارى-دارمەك باعالارىنىڭ ءوسىمى بويىنشا بولعان.
وسى تۇرعىدا «اتىراۋ-ادالدىق الاڭى» كەلەڭسىزدىكتەردى جويۋ ماقساتىندا بىرقاتار جۇمىستار جۇرگىزگەن. «ايتالىق، وبلىستىق دەنساۋلىق ساقتاۋ باسقارماسىنىڭ باسشىسىمەن قالا جانە اۋداندارداعى ەمحانا، اۋرۋحانالاردىڭ باس دارىگەرلەرىمەن كەزدەسۋ وتكىزىلدى. قازىرگى ۋاقىتتا وبلىستىق دەنساۋلىق ساقتاۋ باسقارماسى باسشىسىنىڭ قولداۋىمەن مەملەكەتتەن بەرىلەتىن تەگىن ءدارى-دارمەكتەردىڭ اشىقتىعىن قامتاماسىز ەتۋ ماقساتىندا بىرلەسكەن جۇمىس جۇرگىزىلۋدە»،- دەدى الفيا اديەۆا.
«سىبايلاس جەمقورلىقپەن كۇرەس - مەملەكەت باسشىسى قاسىم-جومارت توقاەۆتىڭ جولداۋىندا ايرىقشا اتاپ ايتقان باستى ماقساتتارىنىڭ ءبىرى. وسىعان وراي، سىبايلاس جەمقورلىقپەن كۇرەسۋدى ۇزدىكسىز جۇرگىزۋ، ونىڭ جولىن كەسۋ، الدىن الۋ جولدارىن كۇشەيتۋ، ءادىس-تاسىلدەرىن ءاردايىم جەتىلدىرىپ وتىرۋ قاجەت دەپ سانايمىن. جەمقورلىققا قارسى كۇرەستە بارلىق تۇلعالار زاڭ مەن سوت الدىندا تەڭ بولۋىن ەسكەرۋ قاجەت»،- دەدى وبلىس اكىمى ماحامبەت دوسمۇحامبەتوۆ.
ايماق باسشىسى ءتيىستى سالا باسشىلارىنان اتالعان كەلەڭسىزدىكتەردىڭ سەبەپتەرىن سۇراپ، الداعى ۋاقىتتا قاتاڭ باقىلاۋعا الۋدى مىندەتتەدى.
