قازاقستان پرەزيدەنتى شىلدە ايىنىڭ ورتاسىندا دەمالىسقا شىعۋدى جوسپارلاپ وتىر. بۇل تۋرالى Sputnik قازاقستانعا مەملەكەت باسشىسىنىڭ ءباسپاسوز حاتشىسى بەرىك ءۋالي ايتتى، دەپ حابارلايدى «ادىرنا» ۇلتتىق پورتالى.
«مەملەكەت باسشىسى شىلدەنىڭ ورتاسىندا ءبىر اپتاعا دەمالىسقا شىعۋدى جوسپارلاپ وتىر. پرەزيدەنت دەمالىسىن قازاقستان اۋماعىندا وتكىزەدى. وزدەرىڭىزگە بەلگىلى، بىلتىر كوروناۆيرۋس پاندەمياسىنا بايلانىستى قاسىم-جومارت كەمەلۇلى دەمالعان جوق»، - دەدى ءۋالي رەسمي ساۋالعا بەرگەن جاۋابىندا.
ول توقاەۆ پرەزيدەنت لاۋازىمىنا كىرىسكەن ساتتەن بەرى ەكى جىل جانە ءۇش اي ىشىندە تەك ءبىر رەت، 2019 جىلدىڭ شىلدەسىندە ءۇش كۇندىك قىسقا مەرزىمدى دەمالىسقا شىققانىن ەسكە سالدى.
بىلتىر جازدا پرەزيدەنت قاسىم-جومارت توقاەۆ ۇكىمەت مۇشەلەرىنە دەمالىستى ۇمىتۋعا كەڭەس بەردى. ەلدە كوروناۆيرۋس ىندەتى ءورشىپ تۇرعان ەدى. مينيسترلەر مەن اكىمدەردىڭ الدىنا ەپيدەميولوگيالىق احۋالدى تۇراقتاندىرۋ مىندەتى قويىلدى. مەملەكەت باسشىسى شەنەۋنىكتەرگە «ەڭبەك دەمالىسى، دەمالىس دەگەن سوزدەردى ۇمىتىڭدار» دەگەن بولاتىن.
"ادىرنا" ۇلتتىق پورتالى
