Qazaqstan prezıdenti shilde aıynyń ortasynda demalysqa shyǵýdy josparlap otyr. Bul týraly Sputnik Qazaqstanǵa memleket basshysynyń baspasóz hatshysy Berik Ýálı aıtty, dep habarlaıdy «Adyrna» ulttyq portaly.
«Memleket basshysy shildeniń ortasynda bir aptaǵa demalysqa shyǵýdy josparlap otyr. Prezıdent demalysyn Qazaqstan aýmaǵynda ótkizedi. Ózderińizge belgili, byltyr koronavırýs pandemııasyna baılanysty Qasym-Jomart Kemeluly demalǵan joq», - dedi Ýálı resmı saýalǵa bergen jaýabynda.
Ol Toqaev prezıdent laýazymyna kirisken sátten beri eki jyl jáne úsh aı ishinde tek bir ret, 2019 jyldyń shildesinde úsh kúndik qysqa merzimdi demalysqa shyqqanyn eske saldy.
Byltyr jazda prezıdent Qasym-Jomart Toqaev úkimet múshelerine demalysty umytýǵa keńes berdi. Elde koronavırýs indeti órship turǵan edi. Mınıstrler men ákimderdiń aldyna epıdemıologııalyq ahýaldy turaqtandyrý mindeti qoıyldy. Memleket basshysy sheneýnikterge «eńbek demalysy, demalys degen sózderdi umytyńdar» degen bolatyn.
"Adyrna" ulttyq portaly
