اقتوبە وبلىسىندا بيىل 1 ميلليون شارشى مەتردەن استام تۇرعىن ءۇي سالىنادى. بۇل تۋرالى وبلىس اكىمى وڭداسىن ورازالين ورتالىق كوممۋنيكاتسيالار قىزمەتىندە وتكەن اقتوبە وبلىسىنىڭ بيىلعى بەس ايداعى الەۋمەتتىك-ەكونوميكالىق دامۋىنىڭ قورىتىندىلارى مەن الداعى كەزەڭگە ارنالعان جوسپارلارى تۋرالى ءباسپاسوز ءماسليحاتى بارىسىندا مالىمدەدى.
وبلىس اكىمى وڭداسىن ۋرازالين مەملەكەت باسشىسىنىڭ ازاماتتاردى تۇرعىن ۇيمەن قامتاماسىز ەتۋ جونىندەگى تاپسىرمالارىنىڭ جۇزەگە اسىرىلۋى جايىندا باياندادى.
«اعىمداعى جىلدىڭ بەس ايى ىشىندە وبلىستا 270 مىڭ شارشى مەتر تۇرعىن ءۇي پايدالانۋعا بەرىلدى، بۇل دەگەنىڭىز 1100-دەن استام پاتەر. جىل سوڭىنا دەيىن كەمىندە 1 ملن شارشى مەتر تۇرعىن ءۇيدى - 7 200-دەن استام پاتەردى پايدالانۋعا بەرۋدى جوسپارلاپ وتىرمىز. وسى جىلى حالىقتىڭ الەۋمەتتىك وسال توپتارىن باسپانامەن قامتاماسىز ەتۋگە 5,6 ميلليارد تەڭگەدەن استام قاراجات ءبولىندى »، - دەپ حابارلادى وبلىس اكىمى.
سونىمەن قاتار، «نۇرلى جەر» مەملەكەتتىك باعدارلاماسى اياسىندا 824 شاقىرىمدىق ينجەنەرلىك-كوممۋنيكاتسيالىق ينفراقۇرىلىمدى، ياعني گاز، سۋ، ەلەكتر جانە كارىز جەلىلەرىن سالۋعا 11,1 ملرد. تەڭگە بولىنەدى.
سونىمەن بىرگە وڭىردە ۇيلەردى جاڭارتۋ جۇمىستارى جۇرگىزىلۋدە - جىل سوڭىنا دەيىن 28 جوبانى ىسكە اسىرۋعا 1 ملرد. تەڭگە ءبولىندى.
سونداي-اق، تۇرعىن ءۇيدى جاڭعىرتۋ جۇمىستارى دەمەۋشىلىك قاراجاتپەن دە جۇزەگە اسىرىلۋدا. اتاپ ايتقاندا، اعىمداعى جىلى اقتوبە وبلىسىنىڭ اكىمدىگى مەن ERG كورپوراتسياسى اراسىنداعى ءوزارا ىنتىماقتاستىق تۋرالى مەموراندۋم اياسىندا جالپى سوماسى 540 ملن.تەڭگەگە 32 ۇيگە كۇردەلى جوندەۋ جۇمىستارى جۇرگىزىلىپ جاتىر.
«ماڭىزدى ماسەلەلەردىڭ ءبىرى بولىپ ارقاشان الەۋمەتتىك نىسانداردىڭ قۇرىلىسى قالا بەرەدى. حالىقتى ساپالى مەديتسينالىق قىزمەتتەرمەن تولىقتاي قامتاماسىز ەتۋ ءۇشىن اعىمداعى جىلى جالپى قۇنى 900 ميلليون تەڭگەدەن اساتىن 8 دەنساۋلىق ساقتاۋ نىسانىن سالۋ جوسپارلانعان. ءۇش اۋىسىمدى جانە اپاتتى مەكتەپتەر ماسەلەسىن شەشۋ ءۇشىن 4800 بالاعا ارنالعان 15 ءبىلىم بەرۋ نىسانى سالىنىپ جاتىر، ونىڭ ىشىندە 10 نىساندى جىل سوڭىنا دەيىن پايدالانۋعا بەرۋ جوسپارلانعان. ناتيجەسىندە بەس ءۇش اۋىسىمدى، التى جەتىسپەيتىن، ءبىر اپاتتى جانە ءۇش ەسكى مەكتەپتىڭ ماسەلەسى شەشىلەدى »، - دەدى سپيكەر.
سونداي-اق، وبلىستا سپورت نىساندارىنىڭ قۇرىلىسى دا جالعاسۋدا. جىل باسىنان بەرى روللەرلىك شاڭعى تراسساسى، ترياتلون پاركى جانە ەكى سپورتتىق-ساۋىقتىرۋ ورتالىعى پايدالانۋعا بەرىلدى. جىل سوڭىنا دەيىن وبلىستىڭ تاعى ءۇش اۋدانىندا سپورتتىق-ساۋىقتىرۋ كەشەندەرىن پايدالانۋعا جوسپارلانۋدا.
