بۇرىن حابارلاعانىمىزداي، قر پارلامەنتى ءماجىلىسىنىڭ الەۋمەتتىك-مادەني كوميتەتى جاقىندا وتكىزگەن «ۇلتتىڭ جاڭا بەينەسىن قالىپتاستىرۋداعى شىعارماشىلىق وداقتار مەن قوعامدىق ۇيىمداردىڭ ءرولى» اتتى القالى باسقوسۋدا جاساعان بايانداماسىندا “اق جول” فراكتسياسى مۇشەسى، دەپۋتات قازىبەك يسا وسىلاي دەپ، ۇلتتىق يدەولوگيا ماسەلەسىن ءسوز ەتتى.
بۇل تۋرالى «قازاق ءۇنى» اقپارات اگەنتتىگى حابارلايدى.
- ۇلتتىڭ جاڭا بولمىسى ۇلتشىلدىق نەگىزدە قالىپتاسۋى كەرەك. مەملەكەت باسشىسى اتاپ ايتىپ، ساناپ كورسەتكەن ۇلتتىڭ جاڭا بولمىسىنا قاجەتتى قاسيەتتەردىڭ ءبارىنىڭ نەگىزى ۇلتشىلدىققا كەلىپ تىرەلەدى. ويتكەنى، كەشە كەڭەس يمپەرياسى كەزىندە 70 جىل ۇلتشىلدىقپەن كۇرەسۋ قازىر تاۋەلسىزدىكتىڭ 30 جىلىندا دا توقتاعان جوق. كورنەكتى جازۋشى عابيدەن ءمۇستافيننىڭ “بۇرىن ءبىز ۇلتشىلدىقپەن كۇرەستىك، ەندى ۇلتسىزدىقپەن كۇرەسەيىك”-دەگەن ايگىلى ءسوزى قازىر وتە وزەكتى بولىپ تۇر.
ۇلتشىلدىق دەگەن ۇعىمنان ءبىزدىڭ بيلىك ادەتتەگىدەي شوشىپ كەتپەۋ ءۇشىن تۇسىندىرە كەتەيىك. ۇلتشىلدىق دەگەنىمىز - مەملەكەتشىلدىك، ەلشىلدىك، پاتريوتتىق! - دەدى دەپۋتات.
ول، سونىمەن قاتار، ەلدە ۇلتتىق يدەولوگيانىڭ جوقتىعىن دا ايتتى.
- رەسەيدە مەملەكەتتىك ءتىلدى قورعاعاندار «پاتريوتتىق» دەپ باعالانىپ، ماقتالادى. ال قازاقستاندا مەملەكەتتىك ءتىلدى قورعاعاندار – ناشار ماعىناسىنداعى «ۇلتشىلدىق» (ناتسيست) دەپ ايىپتالىپ، داتتالادى!
بۇل بىزدە ءالى تولىققاندى ۇلتتىق يدەولوگيانىڭ جوقتىعىن بىلدىرەدى،- دەدى قازىبەك يسا.
