توققا تۇسكەن جانداردى قۇتقارعان ابىلاي: باتىر ەمەسپىن، ادامدىق مىندەتىمدى ورىندادىم!

13952
Adyrna.kz Telegram

بۇگىن الماتى قالاسىنداعى ورتالىق تسيرك ماڭىندا وقىس وقيعا بولدى. تسيرك جانىنداعى فونتان سۋىنداعى توققا ءۇش ادام ءتۇسىپ قالعان. ولاردى سۋدان ابىلاي ەسىمدى جىگىت پەن ەسىمى بەلگىسىز تاعى ءبىر ازامات الىپ شىققان. ءبىز ابىلايدىڭ بايلانىس ءنومىرىن الىپ، قىسقاشا سۇحباتتاسىپ كوردىك. 

- ارمىسىز ابىلاي. بۇگىنگى ەرلىگىڭىزدى كورىپ، وزىڭىزگە ءسۇيسىنىپ وتىرمىز. ادام ءومىرىن قۇتقارىپ قالعانىڭىزعا العىس بىلدىرەمىز. جالپى ءوزىڭىز جايلى قىسقاشا ايتا كەتسەڭىز. جاسىڭىز نەشەدە؟ قايدا وقيسىز نەمەسە جۇمىس ىستەيسىز؟ 

- اسسالاۋماعالەيكۋم. مەنىڭ اتى-ءجونىم بالاپانوۆ ابىلاي. جاسىم 19-دا. قازىرگى تاڭدا الماتى قالاسىنداعى  ق. ي. سəتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ، "اۆتوماتتاندىرۋ جانە باسقارۋ" ماماندىعىنىڭ ەكىنشى كۋرس ستۋدەنتىمىن. تۋعان جەرىم ىلە اۋدانى، بايسەركە اۋىلى.

- بۇگىنگى وقيعا جايلى تولىعىراق ايتىپ بەرسەڭىز. ورتالىق تسيرك ماڭىندا نە بولدى؟ ءوزىڭىزدى دە توق سوعىپ، السىرەپ قالعانىڭىزدى وقىدىم. قازىر دەنساۋلىعىڭىز قالاي؟ 

- بۇگىن ورتالىق تسيرك ماڭىنداعى وقيعا جايلى تولىعىراق ايتار بولسام وقيعا بىلاي بولدى. تسيرك ماڭىندا جاستارى 8-10 شاماسىنداعى قىزدار مەن ولاردىڭ اناسى توققا ءتۇسىپ قالدى. فونتاننىڭ توعىنا. ادامداردىڭ ايعايلاعان داۋىسى شىعىپ، كومەككە شاقىرىپ جاتتى. مەن ول ساتتە سول ماڭداعى ورىندىقتا دەمالىپ وتىرعان ەدىم. ورنىمنان تۇرىپ، نە بولعانىن كورەيىن دەدىم. جاقىنداپ قاراسام سۇمدىق كورىنىستى كوردىم. اناسى مەن بالاسى توققا ءتۇسىپ جاتىر ەكەن. ويلانباستان قۇتقارۋعا كىرىستىم. فونتانعا كىرىپ، اناسىن الىپ شىقتىم. ەكىنشى مارتە قىزىنا بارعانىمدا مەنى دە توق ۇردى. قىزىن باسقا، بەيتانىس ازامات الىپ شىقتى. توققا تاعى ءبىر قىز تۇسكەن ەدى، الايدا توق كۇشى ءالسىز بولىپ، ول قىز ءوزى شىعا الدى. مەن دە فونتان ىشىنەن ءوزىم سىرتقا شىقتىم. قازىر دەنساۋلىعىم جامان ەمەس. وقيعادان كەيىن ۇيگە قايتىپ كەتتىم.

- توق سوققان قىزدى باسقا جان الىپ شىققانىن ايتتىڭىز. ول ازامات جايلى قانداي دا ءبىر اقپارات بىلەسىز بە؟

- ءيا، باسقا ازامات الىپ شىقتى. وكىنىشكە وراي ول ازاماتتىڭ اتى-ءجونىن بىلمەيمىن، اقپارات تا جوق.

- قۇزىرلى ورگاندار تاراپىنان قانداي ارەكەت جاسالدى؟ بيلىك ورگاندارى حابارلاسىپ، حال-جاعدايىڭىزدى ءبىلدى ما؟

- سول ماڭدا پوليتسيا قىزمەتكەرلەرى ءجۇردى. ولار مەنىڭ ءحالىمدى سۇرادى. ولارعا دا ءوز العىسىمدى بىلدىرگىم كەلەدى.

- بۇل ارەكەتىڭىز ەرلىك. ءوزىڭىزدى باتىر سانايسىز با؟

- جوق، مەن ءوزىمدى باتىر سانامايمىن. بۇل مەنىڭ ادامدىق مىندەتىم. سول مىندەتىمدى اتقاردىم.

- امان بول، ابىلاي! ومىردە بارلىق ارمان-ماقساتتارىڭ ىسكە اسىپ، ورىندالسىن. باتىر دەگەن اتقا لايىقسىڭ. 

سۇحباتتاسقان اسحات قاسەنعالي،

"ادىرنا" ۇلتتىق پورتالى

پىكىرلەر