Bügın Almaty qalasyndaǧy Ortalyq sirk maŋynda oqys oqiǧa boldy. Sirk janyndaǧy fontan suyndaǧy toqqa üş adam tüsıp qalǧan. Olardy sudan Abylai esımdı jıgıt pen esımı belgısız taǧy bır azamat alyp şyqqan. Bız Abylaidyŋ bailanys nömırın alyp, qysqaşa sūhbattasyp kördık.
- Armysyz Abylai. Bügıngı erlıgıŋızdı körıp, özıŋızge süisınıp otyrmyz. Adam ömırın qūtqaryp qalǧanyŋyzǧa alǧys bıldıremız. Jalpy özıŋız jaily qysqaşa aita ketseŋız. Jasyŋyz neşede? Qaida oqisyz nemese jūmys ısteisız?
- Assalaumaǧaleikum. Menıŋ aty-jönım Balapanov Abylai. Jasym 19-da. Qazırgı taŋda Almaty qalasyndaǧy Q. İ. Sətbaev atyndaǧy Qazaq Ūlttyq Tehnikalyq Zertteu Universitetınıŋ, "Avtomattandyru jäne basqaru" mamandyǧynyŋ ekınşı kurs studentımın. Tuǧan jerım Ile audany, Baiserke auyly.
- Bügıngı oqiǧa jaily tolyǧyraq aityp berseŋız. Ortalyq sirk maŋynda ne boldy? Özıŋızdı de toq soǧyp, älsırep qalǧanyŋyzdy oqydym. Qazır densaulyǧyŋyz qalai?
- Bügın Ortalyq sirk maŋyndaǧy oqiǧa jaily tolyǧyraq aitar bolsam oqiǧa bylai boldy. Sirk maŋynda jastary 8-10 şamasyndaǧy qyzdar men olardyŋ anasy toqqa tüsıp qaldy. Fontannyŋ toǧyna. Adamdardyŋ aiǧailaǧan dauysy şyǧyp, kömekke şaqyryp jatty. Men ol sätte sol maŋdaǧy oryndyqta demalyp otyrǧan edım. Ornymnan tūryp, ne bolǧanyn köreiın dedım. Jaqyndap qarasam sūmdyq körınıstı kördım. Anasy men balasy toqqa tüsıp jatyr eken. Oilanbastan qūtqaruǧa kırıstım. Fontanǧa kırıp, anasyn alyp şyqtym. Ekınşı märte qyzyna barǧanymda menı de toq ūrdy. Qyzyn basqa, beitanys azamat alyp şyqty. Toqqa taǧy bır qyz tüsken edı, alaida toq küşı älsız bolyp, ol qyz özı şyǧa aldy. Men de fontan ışınen özım syrtqa şyqtym. Qazır densaulyǧym jaman emes. Oqiǧadan keiın üige qaityp kettım.
- Toq soqqan qyzdy basqa jan alyp şyqqanyn aittyŋyz. Ol azamat jaily qandai da bır aqparat bılesız be?
- İä, basqa azamat alyp şyqty. Ökınışke orai ol azamattyŋ aty-jönın bılmeimın, aqparat ta joq.
- Qūzyrly organdar tarapynan qandai äreket jasaldy? Bilık organdary habarlasyp, hal-jaǧdaiyŋyzdy bıldı ma?
- Sol maŋda polisiia qyzmetkerlerı jürdı. Olar menıŋ hälımdı sūrady. Olarǧa da öz alǧysymdy bıldırgım keledı.
- Būl äreketıŋız erlık. Özıŋızdı batyr sanaisyz ba?
- Joq, men özımdı batyr sanamaimyn. Būl menıŋ adamdyq mındetım. Sol mındetımdı atqardym.
- Aman bol, Abylai! Ömırde barlyq arman-maqsattaryŋ ıske asyp, oryndalsyn. Batyr degen atqa laiyqsyŋ.
Sūhbattasqan Ashat Qasenǧali,
"Adyrna" ūlttyq portaly
