بۇل تۋرالى اتىراۋ وبلىسىنىڭ اكىمى ماحامبەت دوسمۇحامبەتوۆ فەيسبۋك جەلىسىندەگى پاراقشاسىندا جازدى.
اتىراۋ وبلىسىنىڭ اكىمى ماحامبەت دوسمۇحامەتوۆ ءوز جازباسىندا ساياسي رەپرەسسيالار حالقىمىزدىڭ دامۋىن تەجەگەنى تۋرالى جازدى.
“حالقىمىز مىڭداعان جىلدىق تاريحىندا تالاي الاساپىراندى باستان كەشىردى. بىراق، وتكەن عاسىرداعى ەڭ اۋىر ناۋبەت پەن زوبالاڭ ۇلتتىڭ جادىندا جاتتالىپ، ۇلتتىق تاريحتىڭ قارالى پاراقشاسىنا قاندى جاسپەن جازىلدى. قازاق حالقىنىڭ قايماقتارىن رەپرەسسياعا ۇشىراتۋ، جاپپاي ساياسي قۋعىن-سۇرگىن، اتا كاسىپتەن ادا ەتە وتىرىپ اشارشىلىق جاساۋ ادامزات تاريحىنداعى ۇلكەن سويقانداردىڭ ءبىرى. ءتۇرلى جالا جابىلىپ، جازىقسىز زارداپ شەگىپ، تۇرمەگە قامالىپ، اتۋ جازاسىنا كەسىلىپ، ەرىكسىز جەر اۋدارىلعان ءجۇز مىڭداعان جازىقسىز جانداردىڭ تاعدىرى ۇلكەن تاريحي ادىلەتتەلىكتى تالاپ ەتەدى”، – دەپ جازدى.
سونداي-اق، مەملەكەت باسشىسى قاسىم-جومارت توقاەۆتىڭ تاپسىرماسىمەن ساياسي قۋعىن-سۇرگىن قۇرباندارىن تولىق اقتاۋ مەن اشارشىلىق تاقىرىبىن تەرەڭ زەرتتەۋ جۇمىستارى جاسالىپ جاتقاندىعىن اتاپ ءوتتى.
“ۇلتتىق ەليتانى جالماعان ساياسي رەپرەسسيالار حالقىمىزدىڭ دامۋىن تەجەپ، الەۋەتىن السىرەتتى. ەل بولىپ ەڭسە تىكتەپ، ۇلت بولىپ ۇيىسۋ پروتسەسسىن تۇتاس عاسىرعا شەگەردى. بۇگىندە وتكەندى زەرتتەپ، بولعان وقيعالاردىڭ اقيقاتىن انىقتاۋعا باسا كوڭىل ءبولىنۋدe. ەلباسى نۇرسۇلتان نازارباەۆتىڭ ساياساتى ارقاسىندا تاۋەلسىزدىك جىلدارى تاريحي اقتاڭداقتار اشىلىپ، شىنايى شەجىرەمىز جازۋعا كىرىستىك. قازىرگى كەزدە مەملەكەت باسشىسى قاسىم-جومارت توقاەۆتىڭ تاپسىرماسىمەن ساياسي قۋعىن-سۇرگىن قۇرباندارىن تولىق اقتاۋ مەن اشارشىلىق تاقىرىبىن تەرەڭ زەرتتەۋ جۇمىستارى جاسالۋدا. جازىقسىز جازالانعان جانداردى اقتاپ، قۇربان بولعان ۇلىلارىمىزدى ۇلىقتاپ، كەزىندە بوسقىن بولعانداردىڭ ۇرپاقتارى تاريحي وتانعا ورالۋدا. بۇنىڭ بارلىعىن تاريحي ادىلەتتىلىكتى قالپىنا كەلتىرۋ دەپ ەسەپتەيمىز. وتكەنىن بىلمەگەن، بولاشاعىن بولجاي المايدى دەگەن. سوندىقتان، تاريحىمىزدىڭ تەك جەڭىستى كەزدەرى عانا ەمەس، قارالى كەزەڭدەرىن دە جادىمىزدا ساقتاپ، وتكەننىڭ ساباعىن جاس بۋىنعا دۇرىس جەتكىزۋىمىز كەرەك. ساياسي قۋعىن-سۇرگىن مەن اشارشىلىق قۇرباندارىنىڭ رۋحىنا تاعزىم ەتىپ، سول بوزداقتار ارمانداعان تاۋەلسىزدىكتى باياندى ەتۋ – بۇگىنگى ۇرپاققا پارىز. ەگەمەندىگىمىز ماڭگىلىك، حالقىمىز امان بولسىن!” ، – دەپ جازدى وبلىس باسشىسى.
