مەملەكەتتىك اۋديت ورگاندارى 570 ملرد تەڭگەنىڭ ءتيىمسىز جۇمسالعانىن انىقتاعان، دەپ حابارلايدى “ادىرنا” ۇلتتىق پورتالى Orda.kz سايتىنا سىلتەمە جاساپ.
رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتورايىمى ناتاليا گودۋنوۆا مەملەكەتتەن بولىنگەن قاراجاتتى ءتيىمسىز جۇمساۋدى بولدىرماس ءۇشىن جاۋاپكەرشىلىكتى كۇشەيتۋ كەرەك دەگەن ويدا.
– ءار تەڭگە ءتيىمدى جۇمسالۋى كەرەكتىگىن ەسكەرسەك، بۇعان جول بەرۋگە بولمايدى. سوندىقتان ءبىز بىلتىر باستاعان مەملەكەتتىك رەسۋرستاردى ءتيىمسىز پايدالانعانى ءۇشىن لاۋازىمدى ادامداردىڭ جاۋاپتىلىعىن كۇشەيتۋ جونىندەگى جۇمىستى جالعاستىرۋ وتە ماڭىزدى دەپ سانايمىز، – دەدى گودۋنوۆا.
قازىرگى تاڭدا بيۋدجەتتى ءتيىمسىز قولدانۋ بويىنشا تەك ەكى اكىمشىلىك جازا قاراستىرىلعان. ناتاليا گودۋنوۆا «زاڭعا تاعى ءۇش جاڭا نورما ەنگىزۋ كەرەك» دەيدى.
– 2021 جىلدىڭ باسىنان بەرى 11 لاۋازىمدى تۇلعا جازالاندى. نورمانى وڭدى-سولدى قولدانۋ فاكتىلەرى كەزدەسكەن جوق. زاڭ بۇزۋشىلىقتىڭ الدىن الۋعا، بولدىرماۋعا سەپتىگىن تيگىزۋدە. بىراق، ازىرگە تەك ونىڭ قولدانىلۋ اياسى وتە تار، – دەدى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتورايىمى.
