«التىن بەلگى» العان تۇلەكتەردىڭ سانى رەكوردتىق كورسەتكىشكە جەتتى

2660
Adyrna.kz Telegram

بيىل قازاقستان بويىشا 9 738 تۇلەك «التىن بەلگى» يەگەرى اتاندى. بۇل – وتكەن جىلدارمەن سالىستىرعاندا رەكوردتىق كورسەتكىش، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.

2019 جىلى توسبەلگىنى 7349 وقۋشى، 2020 جىلى 8615 وقۋشى يەلەنگەن بولاتىن.

بيىل «التىن بەلگى» يەگەرى اتانعان تۇلەكتەردىڭ باسىم بولىگى تۇركىستان (1 856), الماتى (1 432) جانە شىعىس قازاقستان (738) وبلىستارىنان. ەرەكشە ۇلگىدەگى اتتەستات يەگەرلەرى سالتاناتتى شارا بارىسىندا ماراپاتتالدى.

«9738 ۇمىتكەر قورىتىندى اتتەستاتتاۋ بارىسىندا ءوز بىلىمدەرىن دالەلدەپ، «التىن بەلگى» يەگەرى اتاندى. بۇل تۇلەكتەردىڭ جالپى سانىنىڭ 6,2% قۇرايدى. مەكتەپ وقۋشىلارىنىڭ سانى جىل سايىن ارتىپ كەلەدى. وسىعان بايلانىستى، جاقسى كورسەتكىشتەرگە جەتكەندەردىڭ سانى دا ءوسىپ جاتىر. سونىمەن قاتار تاعى قۋانتارلىق جايت — «التىن بەلگى» يەگەرلەرىنىڭ كوبى مۇعالىم ماماندىعىن تاڭداپ جاتىر. بولاشاقتا ءدال وسىنداي وقۋشىلارىمىز مۇعالىمدەردىڭ قاتارىن تولىقتىرسا، نۇر ۇستىنە نۇر»، — دەپ اتاپ ءوتتى ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا.

بيىل «التىن بەلگىگە» ۇمىتكەرلەردىڭ ەمتيحان جۇمىستارىن مەكتەپتەر ەمەس، ءبىلىم باسقارمالارى جانىنداعى كوميسسيالار قاراعانىن ايتا كەتكەن ءجون. كوميسسيا قۇرامىنا بىلىكتى ءارى تاجىريبەلى ءپان مۇعالىمدەرى كىرەدى. قۇرىلعان كوميسسيانىڭ شەشىمىنەن كەيىن عانا وقۋ وزاتتارىنىڭ ءتىزىمى بەكىتىلدى. بۇل «التىن بەلگى» تاعايىنداۋ ءراسىمىنىڭ اشىقتىعىن قامتاماسىز ەتىپ، سىبايلاس جەمقورلىق تاۋەكەلدەرىن جويادى.

جالپى بيىل قازاقستاندىق وقۋشىلار الەمدىك زياتكەرلىك بايقاۋلارعا قاتىسىپ، 67 التىن، 125 كۇمىس جانە 195 قولا مەدال جەڭىپ الدى. سونىمەن بىرگە حالىقارالىق ارەنادا ءوز ءبىلىمىن كورسەتتى. قازاقستان الەمنىڭ 110 ەلىنىڭ اراسىندا بەيرەسمي كوماندالىق ەسەپتە ۇزدىك وتىزدىققا كىردى. 1998 جىلى قازاقستان 50-ءشى ورىندا بولعان ەدى.

"ادىرنا" ۇلتتىق پورتالى

پىكىرلەر