Bıyl Qazaqstan boıysha 9 738 túlek «Altyn belgi» ıegeri atandy. Bul – ótken jyldarmen salystyrǵanda rekordtyq kórsetkish, dep habarlaıdy «Adyrna» ulttyq portaly Stan.kz aqparat agenttigine silteme jasap.
2019 jyly tósbelgini 7349 oqýshy, 2020 jyly 8615 oqýshy ıelengen bolatyn.
Bıyl «Altyn belgi» ıegeri atanǵan túlekterdiń basym bóligi Túrkistan (1 856), Almaty (1 432) jáne Shyǵys Qazaqstan (738) oblystarynan. Erekshe úlgidegi attestat ıegerleri saltanatty shara barysynda marapattaldy.
«9738 úmitker qorytyndy attestattaý barysynda óz bilimderin dáleldep, «Altyn belgi» ıegeri atandy. Bul túlekterdiń jalpy sanynyń 6,2% quraıdy. Mektep oqýshylarynyń sany jyl saıyn artyp keledi. Osyǵan baılanysty, jaqsy kórsetkishterge jetkenderdiń sany da ósip jatyr. Sonymen qatar taǵy qýantarlyq jaıt — «Altyn belgi» ıegerleriniń kóbi muǵalim mamandyǵyn tańdap jatyr. Bolashaqta dál osyndaı oqýshylarymyz muǵalimderdiń qataryn tolyqtyrsa, nur ústine nur», — dep atap ótti bilim jáne ǵylym mınıstrligi mektepke deıingi jáne orta bilim komıtetiniń tóraıymy Maıra Meldebekova.
Bıyl «Altyn belgige» úmitkerlerdiń emtıhan jumystaryn mektepter emes, bilim basqarmalary janyndaǵy komıssııalar qaraǵanyn aıta ketken jón. Komıssııa quramyna bilikti ári tájirıbeli pán muǵalimderi kiredi. Qurylǵan komıssııanyń sheshiminen keıin ǵana oqý ozattarynyń tizimi bekitildi. Bul «Altyn belgi» taǵaıyndaý rásiminiń ashyqtyǵyn qamtamasyz etip, sybaılas jemqorlyq táýekelderin joıady.
Jalpy bıyl qazaqstandyq oqýshylar álemdik zııatkerlik baıqaýlarǵa qatysyp, 67 altyn, 125 kúmis jáne 195 qola medal jeńip aldy. Sonymen birge halyqaralyq arenada óz bilimin kórsetti. Qazaqstan álemniń 110 eliniń arasynda beıresmı komandalyq esepte úzdik otyzdyqqa kirdi. 1998 jyly Qazaqstan 50-shi orynda bolǵan edi.
"Adyrna" ulttyq portaly
