حالىق تىڭ ءادىس تاپتى: الماتىلىقتار كرەديتتى تولىعىمەن كەشىرۋدى تالاپ ەتتى

9590
Adyrna.kz Telegram

الماتىنىڭ ءبىر توپ تۇرعىنى ءوز پروبلەماسىنا نازار اۋدارۋدىڭ تىڭ ءادىسىن تاپتى. مەرزىمى ءوتىپ كەتكەن كرەديتتى تولەپ جۇرگەن ايەلدەر سيىر مەن قويدىڭ ىشەك-قارنىن بانككە الىپ بارعان. وسى اكتسيا ارقىلى ىشكى ورگاندارىن ساتپاي، كرەديتتى تولەي المايتىندارىن كورسەتكىسى كەلدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.

اكتسياعا كەلگەندەر كەيبىر كرەديتتى بەس جىلدان استام ۋاقىت بويى تولەمەگەن. بىرنەشە جىل بۇرىن مەملەكەت تاراپىنان ولارعا كرەديتتىڭ ءبىر بولىگىن وتەۋگە كومەك جاسالعان. الايدا سونىڭ وزىندە قارىزدى جابۋعا اقشا بولماي تۇر.

ماسەلەن، ساعيدا سۇلتانيازوۆا 2007 جىلى يپوتەكامەن 17 ميلليون تەڭگەگە ءۇي ساتىپ العان. كرەديتتىڭ مولشەرلەمەسى 23 پروتسەنت بولدى. بىراق كوپ ۇزاماي، اياعىن زاقىمداپ الدى. سودان قارجىلاي پروبلەمالار باستالىپ، تابىسى كۇرت تومەندەگەن. يپوتەكاسىن تولەي الماي قالدى. مەملەكەت قارىزدىڭ جارتىسىن وتەۋگە كومەكتەستى. الايدا جالعىزباستى ايەل كرەديتتىڭ قالعان بولىگىن جابا المادى. قازىر بانككە 3 پروتسەنتپەن 4 ميلليون تەڭگەنى قايتارۋ قاجەت. اي سايىنعى تولەم – 27 مىڭ تەڭگە. بىراق 55 جاستاعى ايەل وسى سومانى دا كوتەرە الماي وتىر.

«مەنىڭ كامەلەت جاسقا تولماعان بالام بار. ال 14-15 جاستاعى بالانى تاربيەگە سالۋ وڭاي ەمەس. اياعىم اۋىرادى، وتە قيىن بولىپ تۇر»، - دەدى سۇلتانيازوۆا 31 ارناعا بەرگەن سۇحباتىندا.

قارجى نارىعىن دامىتۋ جانە رەتتەۋ اگەنتتىگى پاندەميا كەزىندە قارىز العان ادامداردىڭ جاعدايى ناشارلاماعانىن مالىمدەدى. ادامدار كرەديتتى ءجيى الا باستادى. ال پروبلەمالىق قارىزدار ازايدى. وعان كرەديتتى راسىمدەۋ ءتارتىبىن باقىلاۋدى كۇشەيتۋ شارالارى دا اسەر ەتكەن.

«ماسەلەن تابىسى ەڭ تومەنگى كۇنكورىس دەڭگەيىنەن تومەن ادامدارعا كرەديت بەرۋگە تىيىم سالىندى. تۇتىنۋشىلىق كرەديتتەرگە قاتىستى تالاپ كۇشەيدى»، - دەيدى اگەنتتىك وكىلى ازامات كەنجە.

ال ەكونوميست اندرەي چەبوتارەۆتىڭ ويىنشا، كەيبىر ادامدار 2019 جىلعى كرەديتتى كەشىرۋ شاراسى قايتا وتكىزىلەدى دەپ ۇمىتتەنەدى. ول كەزدە ءاربىر قارىز الۋشىنىڭ 300 مىڭ تەڭگەسى وتەلدى. وسى شارامەن 440 مىڭ ادام قامتىلعان بولاتىن. ساراپشى ونداي جەڭىلدىكتەر ماسىلدىق پسيحولوگياسىنا سەبەپ بولادى دەپ سانايدى.

«مەن تانيتىن كەيبىر ادامداردىڭ اراسىندا «كرەديتكە جاقسى ءبىر ايفوندى كرەديتكە الامىن دا، ارتىنان تولەمەي قويامىن» دەيتىن ادامدار بار. ءبارىبىر ەكى-ءۇش جىلدان كەيىن كەشىرە سالادى. سوندا ەرتەڭ كرەديتتى كەشىرگەن بانكتەردى قۇتقارۋعا تۋرا كەلەدى»، - دەيدى چەبوتارەۆ.

ساراپشى پروبلەمالىق كرەديتى بار ادامدارعا كومەك بەرۋ تەتىكتەرىنىڭ بار ەكەنىن دە ەسكە الدى. ونداي ادامدار بانكتىڭ كرەديتتىك كوميتەتىنە ءوتىنىش جازا الادى. سول جەردە پروتسەنتتى ازايتىپ بەرەدى، يا بولماسا، كرەديتتى تولەۋ مەرزىمىن شەگەرەدى. الايدا ونداي جەڭىلدىكتەردى جاپپاي جاساۋعا بولمايدى.

"ادىرنا" ۇلتتىق پورتالى

پىكىرلەر