تۇركىستاندا حالىق جولدى جاپتى (ۆيدەو)

691

تۇركىستان قالاسىندا تاعى دا شۋ شىقتى. قالانىڭ ىشكى ساياساتى تۇراقسىزدانىپ، حالىق كوتەرىلۋى كوبەيىپ تۇر. بىلتىر دا ءدال وسىلاي تۇرعىندار وبلىس اكىمدىگىنە جاياۋ شىققان بولاتىن. بۇل تۋرالى قالامقاس بوتابەكوۆا اتتى جەلى قولدانۋشىسى Facebook پاراقشاسىندا جازدى، دەپ حابارلايدى «ادىرنا» ۇلتتىق پورتالى.

ول حالىقتىڭ كوتەرىلۋىنە تۇركىستان قالاسىنىڭ بايلانىس ورتالىعى رەسمي جاۋاپ بەرگەنىن ايتتى.

«قالامقاس بوتابەكوۆا، قايىرلى كۇن! 2005-2006ج.ج. تۇركىستان قالاسى، ياسسى اۋىلدىق وكرۋگى اكىمدىگىنىڭ شەشىمدەرىمەن جەكە تۇرعىن ءۇي قۇرىلىسىن جۇرگىزۋ ءۇشىن 243 ازاماتقا جەر تەلىمدەرى بەرىلگەن. الايدا تۇركىستان قالاسى اكىمدىگىنىڭ «جەر قاتىناستارى ءبولىمى» ونىڭ ىشىندە 181 شەشىمنىڭ مۇراعاتتا ءتۇبىرى بولماعانىن انىقتاعان. وسىنىڭ نەگىزىندە اتالعان شەشىمدەر ياسسى اۋىل وكرۋگى اكىمىنىڭ شەشىمىمەن قايتا بۇزىلعان. بۇل جاعداي تۇرعىنداردىڭ ينفراقۇرىلىم جۇيەلەرىنە (تابيعي گاز، جارىق، اۋىز سۋ) قوسىلا الماۋىنا اكەپ سوققان.

قازىرگى تاڭدا، تۋىنداعان ماسەلەنى تۇپكىلىكتى شەشۋ ماقساتىندا جەرگىلىكتى تۇرعىندار مەن قالا اكىمدىگىنىڭ لاۋازىمدى تۇلعالارى اراسىنان جۇمىس توبى قۇرىلدى. جۇمىس توبىنىڭ مىندەتىنە: بەكزات مولتەك اۋدانىنداعى زاڭداستىرىلماعان جەر تەلىمدەرىن تۇگەندەۋ، تىزىمدەرىن قالىپتاستىرۋ، قۇجاتتاردى جيناقتاۋ، قازاقستان رەسپۋبليكاسى ازاماتتىق كودەكستىڭ 244-بابى 3-تارماعىنا سايكەس سوتقا جۇگىنۋ ءۇشىن تالاپ-ارىزدىڭ جوباسىن دايىنداۋ جانە ت.ب. كىرەدى.

بۇگىنگى جاعداي بويىنشا قالا اكىمى نۇربول تۇراشبەكوۆ تۇرعىنداردى قابىلداپ، وتىنىشتەرىن تىڭدادى. تۋىنداعان ماسەلەنىڭ زاڭ اياسىندا شەشىلۋىنە ءتيىستى جۇمىستار جۇرگىزىلەتىنىن مالىمدەدى. ءىستىڭ زەردەلەنۋىنە تۇرعىندار اراسىنان قوعامدىق باقىلاۋ جۇرگىزۋ ماقساتىندا بەلسەندى 3 ازاماتتى قاتىستىرۋعا شەشىم قابىلداندى. جينالعان تۇرعىندار ساعات 10.00-دە تولىعىمەن تارقادى. قازىرگى ۋاقىتتا ساياسي احۋال تۇراقتى»، - دەلىنگەن جازبادا.

ۆيدەونى وسى سىلتەمە بويىنشا كورە الاسىز: https://www.facebook.com/100028635884738/videos/574678913496633/

"ادىرنا" ۇلتتىق پورتالى

پىكىرلەر
رەداكتسيا تاڭداۋى