دالا اڭىزى

2016 جىلعى 15 جەلتوقسان ايىنان باستاپ قازاقستان رەسپۋبليكاسى ۇلتتىق مۋزەيىندە تاۋەلسىزدىكتىڭ 25 جىلدىعى قارساڭىندا سۋرەتشى، قولونەر شەبەرى امان مۇقاجانوۆتىڭ «دالا اڭىزى» اتتى ساندىك-قولدانبالى ونەر تۋىندىلارى كورمەسىنىڭ اشىلۋ سالتاناتى وتكەن بولاتىن. كورمە 2017 جىلعى 30 قاڭتارعا دەيىن جالعاسادى.  

كورمەدە اۆتوردىڭ 200-دەن استام قولدان جاسالعان بۇيىمدارى قويىلعان. ولاردىڭ قاتارىندا سىرعا، ساقينا، بىلەزىك، تانامونشاق، القا سىندى اشەكەيلەر بار.  كورمەگە اشەكەي بۇيىمدارمەن قاتار، سۋرەتشىنىڭ قارىم-قابىلەتىنەن حابار بەرەتىن  سۋرەت جانە گرافيكا، ينستولياتسيا قاتارلى ساندىك قولدانبالى ونەر تۋىندىلارى قويىلعان. امان مۇقاجانوۆ 1987 جىلى الماتى مەملەكەتتىك تەاتر جانە كوركەم سۋرەت ينستيتۋتىنىڭ ساندىك-قولدانبالى ونەر فاكۋلتەتىن تامامداعان. قازاقستان رەسپۋبليكاسى سۋرەتشىلەر  وداعىنىڭ جانە ديزاينەرلەر وداعىنىڭ مۇشەسى. كوپتەگەن حالىقارالىق، رەسپۋبليكالىق كورمە جوبالارىنىڭ قاتىسۋشىسى. حالىقارالىق زەرگەرلىك ونەر كورمەلەرىنىڭ قۇرمەت گراموتالارى مەن باعالى سىيلىقتارىن يەلەنگەن. اۆتورلىق كورمەنىڭ اشىلۋىندا قر ۇلتتىق مۋزەيىنىڭ ديرەكتورى دارحان مىڭباي: «كوركەم دۇنيە تۋدىرۋ ءۇشىن زەرگەردىڭ ءوزىنىڭ كوكىرەگى كوركەمدىككە تولى بولۋى كەرەك. كوكىرەك كوركەم بولعان جەردە عانا ادامنىڭ قولىنان كوركەم دۇنيەلەر تۋادى. ال امان مۇقاجانوۆتىڭ كەۋدەسىنە بۇل كوركەمدىك تۋعان جەرىنىڭ سۇلۋلىعى ارقىلى قونعان دەر ەدىم. جانە بۇل زەرگەر تۋعان جەرىنىڭ كوركەمدىگىن الەم ەستەتيكاسىمەن ۇشتاستىرا بىلگەن»، - دەپ زەرگەردىڭ شىعارماشىلىق زەرتحاناسىنا توقتالىپ ءوتتى.

سالتاناتتى جيىندا اۆتور امان مۇقاجانوۆ تا ءوز كورمەسى جونىندە: «مەن ءوز ۇلتىمنىڭ، تۋعان حالقىمنىڭ ونەرىنە العىسىم شەكسىز. ويتكەنى، وسى ۇلتتىڭ قولونەرى، زەرگەرلىك ونەرى بولماسا، بۇل جەردە مەن دە، سىزدەر دە بولماس ەدىڭىزدەر. بۇگىنگى جانە بولاشاق زەرگەرلەرىمىز سول بابالارىمىزدىڭ ونەرىن وسى كۇنگە يكەمدەپ، ەسكىلىك پەن زاماناۋيلىقتى ۇشتاستىرا ءبىلۋى كەرەك. بۇل – بابالار الدىنداعى ءبىزدىڭ باستى مىندەتىمىز، بولاشاققا دەگەن باستى ماقساتىمىز بولۋى ءتيىس» دەدى.

امان مۇقاجانوۆتى تابيعاتتىڭ اسەمدىگى مەن ادام بالاسىنىڭ بويىنداعى قاراپايىمدىلىق سەكىلدى قاسيەتتەر قىزىقتىرادى. اۆتور وسىناۋ قىزىعۋشىلىعىنىڭ ارقاسىندا ءوزىنىڭ شەبەرلىگىن شىڭداپ، سۋرەت ونەرىنىڭ جاڭا قىرلارىن ىزدەۋدە. قازىرگى تاڭدا سۋرەتشى ساندىك ونەردە مەتالدى قولدانۋدىڭ جانە وڭدەۋدىڭ جاڭا تەحنولوگيالارىمەن جۇمىس ىستەۋدە.