دەپۋتاتتار ۇكىمەتتىڭ جۇمىسىن سىناپ تاستادى

613

ماڭعىستاۋدا ءبىر باۋ ءشوپتىڭ باعاسى 17 مىڭ تەڭگەگە، ءبىر كەلى ارپانىڭ باعاسى 95 تەڭگەگە جەتتى. بۇل ءتورت تۇلىكتى كاسىپ ەتكەن اۋىلداعى اعايىنعا وڭاي بولماي تۇر. جۇرت جۇت كەلدى دەپ الاڭدايدى. ال دەپۋتتار وسىنىڭ ءبارى جۇيەلى جۇمىستىڭ جوقتىعىنان دەپ ۇكىمەتكە سىن ايتتى. ەلدە شەشىمىن تاپپاي تۇرعان مۇنان دا وزگە تۇيتكىلدەر بار. قۋاڭشىلىق، بۇيىردەن قىسقان قىمباتشىلىق، ءبىلىم بەرۋ سالاسىنداعى ولقىلىقتارعا  قاتىستى  دەپۋتاتتىق ساۋالدار دا  جولداندى، دەپ حابارلايدى «ادىرنا» ۇلتتىق پورتالى «استانا» ارناسىنا سىلتەمە جاساپ.

دەپۋتات ەدىل ءجاڭبىرشيننىڭ ايتۋىنشا، تەڭىزدەر مەن وزەندەردىڭ تارتىلۋى، جاۋىن-شاشىننىڭ ازدىعى كوپ  ايماقتىڭ، اسىرەسە اتىراۋ، اقتوبە، قىزىلوردا، ماڭعىستاۋ جانە تۇركىستان وبلىستارىنىڭ اۋىل شارۋاشىلىعى سالاسىن اياقتان تارتىپ تۇر. سۋ تاپشىلىعى مەن قۋاڭشىلىق جايىلىمدىق جەردىڭ كۇيىن قاشىردى. جىل باسىنان بەرى ماڭعىستاۋدا مىڭ جارىم مىڭعا جۋىق مال قىرىلعان. قىزىلوردادا دا جاعداي ءماز ەمەس. مال ازىعى باعاسىنىڭ ەسەلەپ كوتەرىلۋى دە ماسەلەنى ونان سايىن شيەلەنىستىرىپ بارادى.

«ەلىمىزدىڭ مال شارۋاشىلىعىن دامىتۋعا جانە ونىڭ ازىعىن دايىنداۋعا ارنالعان جۇيەلى-جوسپارلى جۇمىستىڭ جوققا جاقىن ەكەنىن ايقىن كورسەتىپ وتىر. ءححى عاسىردا عارىشتى يگەرىپ، اۋستراليا مەن كانادان اسىل تۇقىمدى مال الدىرىپ، دۇنيەنىڭ ءبارىن تسيفرلاندىرىپ جاتقاندا، مالعا ازىق تاۋىپ بەرە الماي جاتقانىمىز وتە ۇيات! قازاق اتىمىزعا سىن ەمەس پە؟» - دەيدى قر پارلامەنتى ءماجىلىسىنىڭ دەپۋتاتى ەدال جاڭبىرشين.

دەپۋتات جۇت جايلاعان اۋداندار مەن ايماقتاردا شۇعىل  تۇردە توتەنشە جاعداي جاريالانۋىن جانە ولارعا ءتيىستى  كومەكتەر كورسەتۋدى سۇرادى. سونداي-اق قۋاڭشىلىقتان قيىندىق كورىپ وتىرعان وڭىرلەرگە باسقا وبلىستاردان مال جايۋعا جانە مال ازىعىن دايىنداۋعا جەر تەلىمدەرى ۋاقىتشا   بەرىلسىن دەگەن ۇسىنىس ايتتى.

ال دەپۋتات ايبەك پاياەۆ ەلىمىزدە وسىرىلەتىن بيدايدى وزگە  مەملەكەتتەر شيكىزات رەتىندە الىپ، نارىققا شىعارىپ، پايدا تاۋىپ وتىرعانىنا قىنجىلادى. ءبىز بار نارسەنى ۇقساتا الماي وتىرمىز دەيدى.

«وزبەكستان ۇن تارتۋ سالاسىن دامىتىپ، ديىرمەندى كاسىپورىندار سالدى.قازاقستاننان باراتىن بيدايدان قوسىمشا قۇن سالىعىن الىپ تاستادى. بيدايىمىزدان ۇن شىعارىپ ونى تەك ىشكى نارىعىمەن قامتىپ قانا قويماي، ءبىزدىڭ ۇنىمىزدى ساتىپ الاتىن اۋعانستانعا دا،  باسقا دا نارىقتارعا ۇندى جىبەرمەكشى.سوندا ءبىزدىڭ ۇكىمەت ۇيىقتاپ وتىر ما؟ قايدا ءبىزدىڭ اينا شارالارىمىز؟» - دەيدى قر پارلامەنتى ءماجىلىسىنىڭ دەپۋتاتى ايبەك پاياەۆ.

تاعى ءبىر وزەكتى ماسەلە-1 جانە 5 سىنىپتارعا ارنالعان  اعىلشىن ءتىلى وقۋلىعىندا كەمشىلىك كوپ. دەپۋتات ماقپال تاجماعامبەتوۆانىڭ ايتۋىنشا، ءبىلىم جانە عىلىم مينيسترلىگى تاراپىنان وڭ باعا بەرىلگەن وقۋلىقتا ويعا قونىمسىز دۇنيەلەر كەزدەسەدى. اقىلعا سىيمايتىن ەرتەگىلەر، مەنتاليتەتىمىزگە جات ماتىندەر جاس ۇرپاقتى اداستىرادى دەيدى ماجىلىسمەن.

«ەكىنشى سىنىپقا ارنالعان وقۋلىقتا ۇلتتىق ءداستۇردىڭ قاتارىنا پاسحا مەن ماسلەننيتسانى ەنگىزىپتى. مۇنى ارينە، قازاقستاندىق مەرەكەلەر دەپ كورسەتسە تۇسىنۋگە بولادى. قازاقتىڭ سالت-داستۇرلەرى مەن ادەت-عۇرىپتارى دەپ جازىلعان تاقىرىپتا شىلدەحانا مەن بالانى قىرقىنان شىعارۋ سياقتى سالت-ءداستۇردىڭ جانىندا ءدىني مەرەكەلەر نەگە ءجۇر؟» - دەيدى قر پارلامەنتى ءماجىلىسىنىڭ دەپۋتاتى، Nur Otan فراكتسياسىنىڭ مۇشەسى ماقپال تاجماعانبەتوۆا.

ال دەپۋتات داريعا نازارباەۆا جەكەمەنشىك بالاباقشا قىزمەتكەرلەرىنىڭ جالاقىسىن كوتەرۋگە قاتىستى ساۋال جولدادى. بۇعان دەيىن بۇل ماسەلە قارالعان. بىراق ءالى شەشىمىن تاپپاي تۇر. جەرگىلىكتى اكىمدىكتەر رەسپۋبليكالىق بيۋدجەتكە قوسىمشا قارجى ءبولۋ جونىندە ءوتىنىم بەرسە دە، قاراجات ءالى جوق.

"ادىرنا" ۇلتتىق پورتالى

پىكىرلەر
رەداكتسيا تاڭداۋى