نىعماتۋلين: مينيستر تسوي، كابينەتىڭىزدەن شىعىپ، جۇمىس ىستەڭىز!

1787
Adyrna.kz Telegram

قر پارلامەنتى ءماجىلىسىنىڭ توراعاسى نۇرلان نىعماتۋلين دەنساۋلىق ساقتاۋ ءمينيسترى الەكسەي تسويعا ءوز ۆەدومستۆاسى جۇمىسىنىڭ ولقىلىعىن ءبىلۋ ءۇشىن ەمحاناعا بارىپ، حالىقپەن سويلەسۋدى ۇسىندى، دەپ حابارلايدى «ادىرنا» ءتىلشىسى zakon.kz-كە سىلتەمە جاساپ.

«قۇرمەتتى مينيستر مىرزا، سىزگە ەلدىڭ الدىنا شىعاتىن ۋاقىت كەلدى. سانيتارلىق دارىگەردىڭ قاۋلىسى ارقىلى ادامدارمەن "سويلەسۋدى" توقتاتىڭىز. اۋرۋحاناعا، ەمحاناعا بارىڭىز، لاج بولسا، اۋداندىققا. وندا كەزەكتە تۇرعان ادامدارمەن سويلەسىڭىز. سول كەزدە مەديتسينالىق كومەكتىڭ ساپاسى تۋرالى كوپ نارسە بىلە الاسىز دەپ ويلايمىن»،– دەدى ءماجىلىس سپيكەرى ۇكىمەتتىڭ 2020 جىلعا ارنالعان رەسپۋبليكالىق بيۋدجەتتىڭ اتقارىلۋى تۋرالى ەسەبىن تالقىلاۋ كەزىندە.

نۇرلان نىعماتۋلين مينيستردەن تەزىرەك جيناقتالىپ، ادامدارمەن، جۋرناليستەرمەن قارىم-قاتىناستى دۇرىس ورناتۋعا تىرىسۋدى سۇرادى.

«الەكسەي ۆلاديميروۆيچ، قازىر دەنساۋلىق ساقتاۋ جۇيەسىنە وڭاي بولىپ جاتپاعانىن، ءبارى دە قوردالانىپ قالعانىن تۇسىنەمىز. بىراق ابىرجۋدىڭ ۋاقىتى ءوتتى، ەندى جيناقتالاتىن ۋاقىت كەلدى. كوممۋنيكاتسيا ورناتىڭىز، ورتالىق كوممۋنيكاتسيالار قىزمەتى دەپ اتالاتىن زال ارقىلى عانا ەمەس. قاعازدان نەمەسە سۋفلەردەن وقىپ بەرە سالاسىز، سودان سوڭ كەتە بەرەسىز، جۋرناليستەردىڭ قويعان سۇراقتارىنىڭ جارتىسىنا جاۋاپ تە بەرمەيسىز. بارىپ، ادامدارمەن سويلەسىڭىز، ءبىز كىم ءۇشىن جۇمىس ىستەپ جاتىرمىز مۇندا؟ ولار ءبىزدىڭ سايلاۋشىلارىمىز. ەل باسشىلىعى ءسىزدى قولدادى، پارلامەنت ءسىزدى قولدادى، مينيسترلىككە بۇرىن-سوڭدى بولماعان قاراجات ءبولىندى، جۇمىس جاسايتىن كەز كەلدى»،—دەدى پالاتا توراعاسى.

ايتا كەتەيىك، بۇگىن ۇكىمەت پەن ەسەپ كوميتەتىنىڭ 2020 جىلعا ارنالعان رەسپۋبليكالىق بيۋدجەتتىڭ اتقارىلۋى بويىنشا ەسەپ ماجىلىستە تالقىلانىپ جاتىر.

«ادىرنا» ۇلتتىق پورتالى

پىكىرلەر