بۇگىندە ەلوردادا 15 مىڭ وقۋشىعا ورىن جەتىسپەيدى، بۇل كورسەتكىش 2025 جىلعا قاراي 90 مىڭعا جەتەدى دەگەن بولجام بار. مەكتەپ تاپشىلىعى ماسەلەسىن شەشۋ ءۇشىن سالىنعان ارالاس ءتىلدى مەكتەپتەر ۇلت ءۇشىن قاۋىپتى – دەدى ساراپشىلار MEDIA CLUB QAZAQSTAN پلاتفورماسىندا وتكەن تىكەلەي ەفيردە.
ەفير بارىسىندا نۇر-سۇلتانداBi Group كومپانياسى سالعان BINOM School ماسەلەسى قوزعالدى. اۋەل باستا قازاق مەكتەبى بولادى دەگەن جالاۋمەن اشىلعان يننوۆاتسيالىق مەكتەپ كەيىن ارالاس جۇيەگە كوشكەن. ونىڭ سەبەبىن مودەراتور اتالعان مەكتەپتىڭ ديرەكتورى شولپان قادىروۆادان سۇراعان بولاتىن، الايدا تۇششىمدى جاۋاپ بولمادى.
«بيىل ءبىرىنشى سىنىپقا ءوتىنىم بەرگەندەردىڭ 70%-ى قازاق ءتىلدى بالالار. قالعان اتا-انالار ورىس تىلىندەگى سىنىپ اشۋدى سۇرايدى. بۇگىندە ەلىمىزدە ارالاس ءتىلدى مەكتەپتەر سانى كوبەيۋدە. بىراق تازا ورىس تىلىندە وقىتاتىن مەكتەپتەر ازايدى. سەبەبى، ولار ورىس مەكتەبىنەن ارالاس ءتىلدى مەكتەپكە اينالىپ جاتىر»,- دەدى شولپان قادىروۆا.
ەفير مودەراتورى ەربولات مۇحامەدجاننىڭ پىكىرىنشە، ارالاس مەكتەپتەر، بالا تاربيەسىنە كەرى اسەر ەتەدى. بۇگىندە ولاردىڭ 90%-ىندا جينالىس، تاربيە ساعاتتارى ورىس تىلىندە ءوتىپ، قوڭىراۋ ۋاقىتىندا وقۋشىلار رەسمي تىلدە سويلەسەدى.
«ەلىمىزدە ارالاس مەكتەپتەر سانى 30%-دى قۇرايدى. ءبىلىم جانە عىلىم مينيسترلىگىندەگى ۇلتتىق ءبىلىم بەرۋ دەرەكتەر قورىنىڭ 2021 جىلعى مالىمەتىنە سايكەس، قازاقستاندا 1,5 ملن-عا جۋىق بالا 2047 ارالاس ءتىلدى مەكتەپتە ءبىلىم الۋدا. ارالاس مەكتەپتەردىڭ سانى باسىم وڭىرلەردىڭ كوشىن الماتى وبلىسى باستاپ تۇر. ونداعى 306 ارالاس مەكتەپتە 256 020 وقۋشى ءبىلىم الۋدا. ماڭعىستاۋ وبلىسىنداعى 15 ارالاس مەكتەپتە 25 744 بالا وقىپ جاتىر»,- دەپ اتاپ ءوتتى ەربولات مۇحامەدجان.
MEDIA CLUB QAZAQSTAN
70-30-42
