ەلوردا اكىمدىگى باتىرحان شۇكەنوۆ ەسكەرتكىشىنىڭ ەڭ جاقسى ەسكيز-يدەياسى بايقاۋىن وسى جىلدىڭ ماۋسىم ايىنىڭ سوڭىنا دەيىن ۇزارتتى، دەپ حابارلايدى "ادىرنا" ۇلتتىق پورتالى zakon.kz-كە سىلتەپ.
اكىمدىكتىڭ حابارلاۋىنشا، بايقاۋ ازاماتتاردىڭ قىزىعۋشىلىعى مەن قاتىسۋىن ەسكەرە وتىرىپ كەڭەيتىلدى.
كومپوزيتوردىڭ ءارتۇرلى ۆارياتسيادا بەينەلەنگەن جاڭا ەسكيزدەرى پايدا بولدى.
ەسكيزدەر بويىنشا ۇسىنىستاردى Birge پلاتفورماسىنا (https://birge-elorda.kz/nur-sultan/) - تومەنگى بۇرىشىنداعى وڭ جاقتا «كەرى بايلانىس» باتىرماسىمەن سونداي-اق centerofurbanism@gmail.com مەكەن-جايىنا جىبەرۋگە بولادى. كەز-كەلگەن ادام قاتىسا الادى.
قالالىق ساياباققا تالانتتى ءانشى جانە سازگەر باتىرحان شۇكەنوۆكە ەسكەرتكىش ورناتۋ جوسپارلانىپ وتىر. جوبا دەمەۋشىلىك قاراجاتقا جۇزەگە اسىرىلادى.
بۇعان دەيىن ەلوردادا جەڭىس كۇنى قارساڭىندا كەڭەس وداعىنىڭ ەكى دۇركىن باتىرى، اتى اڭىزعا اينالعان ۇشقىش تالعات بيگەلدينوۆكە ەسكەرتكىش ورناتىلعان بولاتىن. ەسكەرتكىش سارىارقا داڭعىلىنىڭ بويىندا ورنالاسقان (تالعات بيگەلدينوۆ كوشەسىنىڭ قيىلىسىندا). جوبادا ءمۇسىنشى نۇرلان دالباي مەن ساۋلەتشى راسۋل ساتىبالديەۆ جۇمىس جاسادى. ەسكەرتكىش قولا مەن گرانيتتەن جاسالعان. وندا تالعات بيگەلدينوۆ ەكىنشى دۇنيەجۇزىلىك سوعىس كەزىندە ۇشقىشتىڭ فورماسىنداعى جاس جىگىت رەتىندە بەينەلەنگەن.
"ادىرنا" ۇلتتىق پورتالى
