كامەلەتكە تولماعان بالاسىنا كولىك تىزگىنىن بەرگەن ماس اكەگە قاتىستى ەكى اكىمشىلىك حاتتاما تولتىرىلدى، دەپ حابارلايدى «ادىرنا» ءتىلشىسى قوستاناي وبلىسىنىڭ پوليتسيا دەپارتامەنتىنە سىلتەمە جاساپ.
وقيعا اعىمداعى جىلدىڭ 31 مامىرىندا ارقالىق قالاسىندا بولعان.
پوليتسەيلەر "قاۋىپسىز جول" جەدەل الدىن الۋ ءىس-شاراسىن وتكىزۋ اياسىندا "MITSUBISHI PAJERO" اۆتوكولىگىن توقتاتقان. جۇرگىزۋشى قىزمەتكەرلەردىڭ زاڭدى تالاپتارىن ورىنداۋدىڭ ورنىنا جاسىرىنۋعا تىرىسقان.
«قۋدالاۋدان كەتىپ، ول ازاماتتاردىڭ ءومىرى مەن دەنساۋلىعىنا قاۋىپ ءتوندىرىپ، بىرنەشە رەت توتەنشە جاعداي جاسادى. داۋىس زورايتقىش قۇرىلعىنىڭ كومەگىمەن پوليتسيا قىزمەتكەرلەرى كولىك قۇرالىن توقتاتۋ تۋرالى بىرنەشە رەت بۇيرىق بەردى، جۇرگىزۋشىگە باعىنباعان جاعدايدا تابەلدىك قارۋ قولدانىلاتىنىن ەسكەرتتى.
ىقتيمال سالدارىن باعالاي وتىرىپ، پوليتسيا قىزمەتكەرلەرى "قۇقىق قورعاۋ قىزمەتى تۋرالى" زاڭنىڭ 61-بابىنىڭ 5-تارماعىنا سايكەس ارتقى دوڭعالاققا زاقىم كەلتىرۋ ارقىلى كولىكتى ماجبۇرلەپ توقتاتۋ ءۇشىن تابەلدىك قارۋدى قولداندى. وسىدان كەيىن عانا اۆتوكولىك توقتاتىلدى»،— دەلىنگەن حابارلامادا.
ايت كەتەيىك، كولىكتى 2007 جىلى دۇنيەگە كەلگەن كامەلەتكە تولماعان بالا باسقارعان. الدىڭعى جولاۋشى وتىرعىشىندا ماس كۇيىندە 35 جاستاعى اكەسى بولعان. وعان قاتىستى 612-باپتىڭ 5-بولىگى (باسقارۋ قۇقىعى جوق ادامعا ت/ق باسقارۋدى بەرۋ) جانە 613-باپتىڭ 1-بولىگى (ت/س توقتاتۋ تۋرالى زاڭدى تالاپتاردى ورىنداماۋ) بويىنشا ەكى اكىمشىلىك حاتتاما جاسالدى.
«ادىرنا» ۇلتتىق پورتالى
