ەلىمىزدە الماتى، پاۆلودار، تۇركىستان، اقتوبە جانە قىزىلوردا وبلىستارىنداعى 12 ساۋىقتىرۋ ۇيىمى سانيتاريالىق قاعيدالار مەن گيگيەنالىق نورماتيۆتەردىڭ تالاپتارىنا سايكەس ەكەندىگى تۋرالى قورىتىندىنى الدى دەپ حابارلايدى "ادىرنا" ۇلتتىق پورتالى قر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنە سىلتەمە جاساپ.
باس مەملەكەتتىك سانيتاريالىق دارىگەردىڭ قاۋلىسىمەن بالالاردى ساۋىقتىرۋ لاگەرلەرىنىڭ قىزمەتى الەۋمەتتىك-ەكونوميكالىق نىسانداردىڭ جۇمىسىن شەكتەۋ كريتەريلەرىمەن ايقىندالعان.
اتاپ ايتساق، «جاسىل» ايماقتاعى وبلىستارعا جازعى لاگەرلەر شەكتەۋسىز، «سارى» ايماقتارداعى لاگەرلەر - 50%، «قىزىل» ايماقتاعى لاگەرلەر 30% جۇكتەمەمەن جۇمىس ىستەيدى.
مۇنىمەن قوسا، باس مەملەكەتتىك سانيتاريالىق دارىگەردىڭ 26 مامىرداعى قاۋلىسىنا سايكەس بالالاردى ساۋىقتىرۋ لاگەرلەرىنىڭ (مەكتەپ جانىنداعى، قالا سىرتىنداعى) شەكتەۋ ءىس-شارالارى، ونىڭ ىشىندە كارانتين كەزىندەگى قىزمەت الگوريتمى بەكىتىلدى. وعان سايكەس، ستاتسيونارلىق دەمالىس جانە ساۋىقتىرۋ ۇيىمدارىنىڭ پەرسونالىنا جۇمىس باستالعانعا دەيىن 72 ساعات بۇرىن جاسالعان پتر-زەرتتەۋدىڭ تەرىس ناتيجەسى بار انىقتاما نەمەسە كوروناۆيرۋسقا قارسى ۆاكتسينانىڭ تولىق كۋرسىن العانىن راستايتىن قۇجات بولعان جاعدايدا عانا قىزمەتىنە كىرىسۋگە رۇقسات بەرىلەدى.
ءاربىر بالا لاگەرگە كەلۋ كەزىندە دەنساۋلىق جاعدايى تۋرالى قۇجاتتاردى (ساۋىقتىرۋ لاگەرىنە باراتىن وقۋشىعا ارنالعان 079/ۋ ۇلگىسىندەگى مەديتسينالىق انىقتاما), ينفەكتسيالىق اۋرۋلارعا، ونىڭ ىشىندە كوروناۆيرۋس ينفەكتسياسىنا شالدىققان ناۋقاستارمەن بايلانىستىڭ جوقتىعىن راستايتىن انىقتامالاردى، لاگەرگە كەلگەنگە دەيىن 72 ساعات بۇرىن جۇرگىزىلگەن پتر-زەرتتەۋدىڭ تەرىس ناتيجەسى بار قۇجاتتى ۇسىنۋى شارت.
سونداي-اق ساۋىقتىرۋ ۇيىمدارىنىڭ بارلىعى سانيتارلىق ەرەجەلەردىڭ تالاپتارىنا سايكەس كەلۋى قاجەت. دالىرەك ايتقاندا، بالالار لاگەرلەرى (جىل بويى جۇمىس ىستەيتىن ۇيىمداردى قوسپاعاندا) ساۋىقتىرۋ ماۋسىمى باستالعانعا دەيىن سانيتاريالىق-ەپيدەميولوگيالىق قورىتىندى الۋعا مىندەتتى. جىل بويى جۇمىس ىستەيتىن ساۋىقتىرۋ ۇيىمدارى سانيتاريالىق-ەپيدەميولوگيالىق قورىتىندىنى نىساندى پايدالانۋ مەرزىمى باستالعانعا دەيىن ءبىر رەت الادى.
"ادىرنا" ۇلتتىق پورتالى.
