قازاقستاننان باحرەينگە قىزداردى جەزوكشەلىك ءۇشىن جىبەرۋمەن اينالىسقان ترانسۇلتتىق ۇيىمداسقان توپتى باسقارعان ايەل ەكستراديتسيالاندى دەپ حابارلايدى "ادىرنا" ۇلتتىق پورتالى باس پروكۋراتۋرانىڭ ءباسپاسوز قىزمەتىنە سىلتەمە جاساپ.
«2021 جىلعى 5 ماۋسىمدا باس پروكۋراتۋرا مەن ينتەرپول قىزمەتكەرلەرى قازاقستان رەسپۋبليكاسى سىرتقى ىستەر مينيسترلىگىنىڭ كومەگىمەن باحرەين كورولدىگىنەن زاريفا وسمانوۆانى ەكستراديتسيالادى. وعان قازاقستاننان باحرەينگە قىزداردى جىنىستىق قاتىناستارعا ءتۇسۋ ماقساتىندا پايدالانۋ ءۇشىن جىبەرۋدى جۇزەگە اسىرعان ترانسۇلتتىق ۇيىمداسقان توپتى باسقارعان دەگەن كۇدىك كەلتىرىلۋدە»، — دەلىنگەن حابارلامادا.
ەسكە سالا كەتسەك، قىلمىس جاسالعاننان كەيىن ز.وسمانوۆا قىلمىستىق قۋدالاۋ ورگاندارىنان جاسىرىندى، سول ءۇشىن حالىقارالىق ىزدەۋگە جاريالانعان. قازىرگى ۋاقىتتا ول نۇر-سۇلتان قالاسىنىڭ تەرگەۋ يزولياتورىنا قاماۋعا الىندى.
ەسكە سالا كەتەيىك، وتكەن جىلى سەكسۋالدىق قۇلدىق ءۇشىن قازاقستاننان باحرەينگە قىزداردى جەتكىزگەن قىلمىستىق توپتىڭ ارەكەتى اشكەرە بولعان ەدى.
2020 جىلى اقپاندا قر سىرتقى ىستەر مينيسترلىگىنىڭ مالىمەتىنشە، قازاقستاننىڭ ساۋد ارابياسىنداعى ەلشىلىگىنىڭ جاردەمىمەن باحرەين پوليتسياسى 21 قر ازاماتشاسىن سەكسۋالدىق قۇلدىقتان بوساتتى. قىلمىسكەرلەر ادامداردىڭ سەنىمىنە كىرىپ، شەتەلدە كوپ اقشا تابۋعا بولاتىنى جونىندە وتىرىك سوزگە سەندىرگەن. بويجەتكەندەر كەلىسكەننەن كەيىن ولاردىڭ قۇجاتىن راسىمدەۋ، زارداپ شەگۋشىلەردى، ونىڭ ىشىندە كامەلەتكە تولماعانداردى زاڭدى جولمەن باحرەين كورولدىگىنە الىپ شىعۋدى ۇيىمداستىرعان.
قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ وسى ىسپەن اينالىسقان قىلمىستىق توپتىڭ قۇرامىندا قازاقستان ازاماتى بولعانىن مالىمدەدى.
— جالپى زارداپ شەككەن 39 ادامدى انىقتادىق، ولار — شىمكەنت قالاسى مەن تۇركىستان وبلىسىنىڭ تۇرعىندارى. قازىرگى كەزدە قىلمىستىق ءىس بويىنشا كۇدىكتى رەتىندە 19 ادام تانىلدى. ولاردىڭ اراسىندا ۇشەۋىنە ىزدەۋ جاريالاندى، - دەدى قر ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ.
2020 جىلى قىركۇيەك ايىندا وسى وقيعا بويىنشا قر 135-بابى 4-بولىگى 2-تارماعى (كامەلەتكە تولماعانداردىڭ ساۋداسى) جانە 128-بابى 3-بولىگى (ادام ساۋداسى) بويىنشا سوتقا دەيىنگى تەرگەۋ امالدارى جۇرگىزىلدى. قر ىشكى ىستەر مينيسترلىگىنىڭ مالىمەتىنشە، ۇيىمداستىرۋشىلاردىڭ كەيبىرى ۇستالعان.
"ادىرنا" ۇلتتىق پورتالى.
