وڭتۇستىك كورەيادا قازاقستاندىق بويجەتكەندى جەزوكشەلىكپەن اينالىسۋعا ماجبۇرلەگەنى بەلگىلى بولدى، دەپ حابارلايدى "ادىرنا" ءتىلشىسى Stan.kz اقپارات اگەنتتىگىنە سىلتەمە جاساپ.
جەرگىلىكتى پوليتسيا شەتەلدىك ايەلدەردى وڭتۇستىك كورەياعا الداپ شاقىرىپ، لاس ارەكەتتەرمەن اينالىسۋعا ماجبۇرلەيتىن قىلمىستىق توپتى قۇرىقتاعان.
قىلمىستىق توپتىڭ ءىسى وڭتۇستىك كورەيانىڭ چەدجۋ پروۆينتسياسى استاناسىنىڭ اۋداندىق سوتىندا قارالىپ، قىلمىسكەرلەرگە "شەتەلدىك ايەلدەردى جەزوكشەلىكپەن اينالىسۋعا ماجبۇرلەدى" دەگەن ايىپ تاعىلدى.
وڭتۇستىك كورەيادا ەكى ايىپتالۋشى ەلگە كىرۋ ءتارتىبىنىڭ كۇردەلى بولۋىن ەسكەرىپ، قازاقستان ازاماتتارىن نىسان رەتىندە كوزدەگەن. سولاي قاساقانا قازاق ايەلدەرىن ىزدەي باستاعان.
قىلمىستىق توپ الەۋمەتتىك جەلى ارقىلى 20 جاستاعى قازاقستاندىق بويجەتكەنمەن تانىسىپ، وعان كورەيادا جۇمىس تابۋعا كومەكتەسەتىنىن ايتىپ سەندىرگەن. الايدا كورەياعا بارعاننان كەيىن قازاقستاندىقتىڭ تولقۇجاتىن الىپ، ونى زورلاپ، ۆيدەونى تاراتامىن دەپ قورقىتىپ، قىزدى جەزوكشەلەر ۇيىنە بەرگەن.
«ولار ايەلدەردى باردا جۇمىس ىستەيمىن دەپ الداپ، ەلگە كىرگىزگەن. سودان كەيىن ولار جابىرلەنۋشىلەردى پاتەرىندە قاماپ، كليەنتتەرگە قىزمەت كورسەتۋگە ماجبۇرلەگەن. ءبىر ايەل قاشىپ ۇلگەرگەن، سودان كەيىن ول پوليتسەيلەرگە حابارلاسقان. قۇقىق قورعاۋ قىزمەتكەرلەرى وقيعا ورنىنا بارىپ، كۇدىكتىلەردى تۇتقىنداپ، بۇل فاكتى بويىنشا جان-جاقتى تەرگەۋ جۇرگىزدى»، – دەپ جازىلعان جەرگىلىكتى باسىلىمدا.
ەڭ سوراقىسى، قىلمىستىق توپ قۇرامىندا 40 جاستاعى قازاقستان ازاماتى بولعان. جاس قازاق قىزىن جۇمىسقا ورنالاستىرۋعا كەپىلدىك بەرگەن دە سول قازاقستاندىق ازامات ەكەن. سوت ۇكىمىمەن ايىپتالۋشىلار ءبىر جىلدان ءۇش جىلعا دەيىن باس بوستاندىعىنان ايىرىلدى.
