بۇگىن نۇر-سۇلتان قالاسىندا قر ۇلتتىق اكادەميالىق كىتاپحاناسىنىڭ “مىرزاتاي جولداسبەكوۆ مەموريالدىق-كىتاپ كوللەكتسيالىق زالىندا” ەلىمىزدە برەندكە اينالعان «ادەمى-اي» ساۋدا بەلگىسىنىڭ نەگىزىن قالاۋشى، بەلگىلى كاسىپكەر ءارى كوللەكتسيونەر-ەتنوگراف باھارگۇل تولەگەننىڭ «قازاق قىزىمىن» كىتابىنىڭ تانىستىرىلىمى ءوتتى. شاراعا زيالى قاۋىم وكىلدەرى، كاسىپكەرلەر، ۇلتتىق سالت-ءداستۇردى ناسيحاتتاپ جۇرگەن تۇلعالار، باق وكىلدەرى، ونەر ادامدارى قاتىستى.
«قازاق قىزىمىن» كىتابى جالپى وقىرمانعا ارنالعان موتيۆاتسيالىق ەسسە. اتالعان كىتاپتا كاسىبىن شاعىن دۇكەننەن باستاپ، قازاقستاننىڭ وڭىرلەرىندە فيليالدارىن وركەندەتىپ، ۇلكەن كومپانياعا اينالدىرعان كاسىپكەردىڭ جەكە تاجىريبەسى، تۇيگەندەرى مەن بىلگەندەرى، بيزنەس جولى قامتىلعان. بۇل قازاقتىڭ قىز-كەلىنشىكتەرى ءۇشىن، كاسىپ باستاۋعا نيەتتى كەز كەلگەن وقىرمان ءۇشىن پايدالى تۋىندى بولماق.
باھارگۇل تولەگەن كىتابىندا ءوز كاسىبىن دوڭگەلەتكىسى كەلەتىن كەز كەلگەن جانعا بيزنەستە نەنىڭ ماڭىزدى ەكەنىنە جول سىلتەيدى. كاسىپكەر ءۇشىن يدەيادان ىسكە، ىستەن تاجىريبەگە جەدەل ورلەۋ ماڭىزدى. كىتاپتا اۆتور تابىستى كاسىپكەر رەتىندە ءوزىنىڭ تولايىم تاجىريبەسىمەن ءبولىسىپ، بيزنەستىڭ قىر-سىرىمەن تانىستىرادى. جالپى، قازىرگى ۋاقىتتا جەكە كاسىبىن اشۋعا تالاپتانىپ جۇرگەن وتانداستارىمىزعا ارنالعان انا تىلىمىزدەگى ساۋاتتى كومەكشى قۇرالدار ساناۋلى. سول تۇرعىدان، بەلگىلى كاسىپكەر باھارگۇل تولەگەن وسى تەكتەس ەڭبەكتەرى ارقىلى بيزنەستى قازاقشالاندىرۋعا دا ۇلەس قوسىپ جۇرگەنىن ايتا كەتۋ كەرەك.
ەڭبەك جالپى قىز-كەلىنشەكتەرگە، كاسىپكەرلىككە، بيزنەسكە قىزىعۋشىلىق تانىتقان بارشا وقىرمانعا، قالىڭ قاۋىمعا، جاستارعا، جوعارى وقۋ ورىندارىنىڭ ستۋدەنتتەرىنە ارنالعان. اۆتور بيزنەس تاقىرىبىن بۇگىنگى كوزقاراس تۇرعىسىنان ءجىتى سارالاعان، جەتە زەرتتەگەن. قازىرگى ۋاقىتتاعى بيزنەستىڭ جاڭا قۇرالدارىن يگەرسەم-بىلسەم، زەردەلەسەم، توقىسام، ۇيرەنسەم دەگەن كوزىقاراقتى كاسىپ باستاسام دەگەن جۇرتشىلىققا، اسىرەسە جاستارعا الار ءتالىم جەتىپ ارتىلادى.كىتاپ قاراپايىم تىلمەن جازىلعان. مىڭ دانا تارالىممەن جارىق كورگەن اتالعان كىتاپ كوركەم بەزەندىرىلگەن.
كىتاپ ەكى تاراۋدان تۇرادى. ءبىرىنشى تاراۋىندا اۆتور ءوزىنىڭ ءومىربايانىن، كاسىپتى قالاي باستاعانىن بايانداپ، جەتىستىككە جەتۋىنىڭ قۇپياسىمەن بولىسەدى. تاجىريبەلى كاسىپكەر سونداي-اق، جاڭادان كاسىپ باستايمىن دەگەن وقىرماندارعا بيزنەستىڭ قىر-سىرىن تاپتىشتەپ، تالداپ، تارازىلاپ تۇسىندىرەدى. بيزنەس ادامىنا قاجەتتى قاسيەتتەر مەن ادەتتەر، مىنەز-قۇلىق پەن ءبىلىم كوكجيەگى تۋرالى اڭگىمەلەيدى. پايدا تابۋدىڭ، وعان قوسا شىعىنعا ۇشىراماۋدىڭ العىشارتتارىن پىسىقتايدى.
ال، ەكىنشى تاراۋدا باھارگۇل تولەگەنقىزى ەتنوگراف رەتىندە حالقىمىزدىڭ اسىل مۇراسى جاۋھار جادىگەرلەردى قالاي جيناعانىن، وعان قىزىعۋشىلىعىنىڭ نەدەن باستالعانىن باياندايدى. ءوزى وتكىزگەن كورمەلەردىڭ ماڭىزىنا توقتالادى. سونداي-اق، اشەكەي بۇيىمدار تۋرالى كەڭىنەن مالىمەت بەرىپ، جەكە مۇراجايىندا كوز تارتىپ تۇرعان جادىگەرلەردى توپتاپ تانىستىرادى.
