Búgin Nur-Sultan qalasynda QR Ulttyq Akademııalyq kitaphanasynyń “Myrzataı Joldasbekov memorıaldyq-kitap kollekııalyq zalynda” elimizde brendke aınalǵan «Ádemi-Aı» saýda belgisiniń negizin qalaýshy, belgili kásipker ári kollekıoner-etnograf Bahargúl Tólegenniń «QAZAQ QYZYMYN» kitabynyń tanystyrylymy ótti. Sharaǵa zııaly qaýym ókilderi, kásipkerler, ulttyq salt-dástúrdi nasıhattap júrgen tulǵalar, BAQ ókilderi, óner adamdary qatysty.
«QAZAQ QYZYMYN» kitaby jalpy oqyrmanǵa arnalǵan motıvaııalyq esse. Atalǵan kitapta kásibin shaǵyn dúkennen bastap, Qazaqstannyń óńirlerinde fılıaldaryn órkendetip, úlken kompanııaǵa aınaldyrǵan kásipkerdiń jeke tájirıbesi, túıgenderi men bilgenderi, bıznes joly qamtylǵan. Bul qazaqtyń qyz-kelinshikteri úshin, kásip bastaýǵa nıetti kez kelgen oqyrman úshin paıdaly týyndy bolmaq.
Bahargúl Tólegen kitabynda óz kásibin dóńgeletkisi keletin kez kelgen janǵa bızneste neniń mańyzdy ekenine jol silteıdi. Kásipker úshin ıdeıadan iske, isten tájirıbege jedel órleý mańyzdy. Kitapta avtor tabysty kásipker retinde óziniń tolaıym tájirıbesimen bólisip, bıznestiń qyr-syrymen tanystyrady. Jalpy, qazirgi ýaqytta jeke kásibin ashýǵa talaptanyp júrgen otandastarymyzǵa arnalǵan ana tilimizdegi saýatty kómekshi quraldar sanaýly. Sol turǵydan, belgili kásipker Bahargúl Tólegen osy tektes eńbekteri arqyly bıznesti qazaqshalandyrýǵa da úles qosyp júrgenin aıta ketý kerek.
Eńbek jalpy qyz-kelinshekterge, kásipkerlikke, bızneske qyzyǵýshylyq tanytqan barsha oqyrmanǵa, qalyń qaýymǵa, jastarǵa, joǵary oqý oryndarynyń stýdentterine arnalǵan. Avtor bıznes taqyrybyn búgingi kózqaras turǵysynan jiti saralaǵan, jete zerttegen. Qazirgi ýaqyttaǵy bıznestiń jańa quraldaryn ıgersem-bilsem, zerdelesem, toqysam, úırensem degen kóziqaraqty kásip bastasam degen jurtshylyqqa, ásirese jastarǵa alar tálim jetip artylady.Kitap qarapaıym tilmen jazylǵan. Myń dana taralymmen jaryq kórgen atalǵan kitap kórkem bezendirilgen.
Kitap eki taraýdan turady. Birinshi taraýynda avtor óziniń ómirbaıanyn, kásipti qalaı bastaǵanyn baıandap, jetistikke jetýiniń qupııasymen bólisedi. Tájirıbeli kásipker sondaı-aq, jańadan kásip bastaımyn degen oqyrmandarǵa bıznestiń qyr-syryn táptishtep, taldap, tarazylap túsindiredi. Bıznes adamyna qajetti qasıetter men ádetter, minez-qulyq pen bilim kókjıegi týraly áńgimeleıdi. Paıda tabýdyń, oǵan qosa shyǵynǵa ushyramaýdyń alǵysharttaryn pysyqtaıdy.
Al, ekinshi taraýda Bahargúl Tólegenqyzy etnograf retinde halqymyzdyń asyl murasy jaýhar jádigerlerdi qalaı jınaǵanyn, oǵan qyzyǵýshylyǵynyń neden bastalǵanyn baıandaıdy. Ózi ótkizgen kórmelerdiń mańyzyna toqtalady. Sondaı-aq, áshekeı buıymdar týraly keńinen málimet berip, jeke murajaıynda kóz tartyp turǵan jádigerlerdi toptap tanystyrady.
