شارتتى تۇردە بوستاندىققا شىققان قىلمىسكەر تاعى ءۇش ايەلدى ءولتىردى

2344
Adyrna.kz Telegram

شارتتى تۇردە بوستاندىقتا جۇرگەن قاندىقول قىلمىسكەر ءۇش ايەلدى زورلاپ، ءولتىرىپ تاستاعان. بۇل تۋرالى «نەمولچي.كز» قوزعالىسىنىڭ باسشىسى دينا ءتاڭسارى جازدى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.

دينا ءتاڭسارى قۇزىرەتتى ورگانداردىڭ مۇنداي قىلمىسكەردى بوستاندىققا جىبەرۋىن قاتەلىك دەپ سانايتىنىن ايتتى.

«رۋستام كيكنادزە 1980 جىلى ومىرگە كەلگەن، جامبىل وبلىسىنىڭ تۋماسى. ول 2004 جىلى جامبىل وبلىستىق سوتىنىڭ شەشىمىمەن باس بوستاندىعىنان ايىرىلعان. سوت ونى قىلمىستىق كودەكستىڭ 96 بابى 2-تارماعى بويىنشا 16 جىلعا سوتتاعان»، – دەپ جازدى ول.

وعان قوسا، كيكنادزە زورلاۋ بابى بويىنشا دا ايىپتالعان. بىراق بۇل باپ بويىنشا ول اقتالىپ، جازاسىن وتەۋ مەرزىمى 14 جىلعا دەيىن قىسقاردى.

«جامبىل وبلىسى بايزاق اۋداندىق سوتىنىڭ 2013 جىلعى 18 شىلدەدەگى قاۋلىسىمەن قازاقستان رەسپۋبليكاسىنىڭ قىلمىستىق كودەكسىنىڭ 70-بابىنا سايكەس كيكنادزە 2013 جىلدىڭ 15 تامىزىندا شارتتى تۇردە مەرزىمىنەن بۇرىن بوساتىلعان. ول ايەلدى قاتىگەزدىكپەن ءولتىرىپ، دەنەسىن ورتەپ جىبەرگەنى ءۇشىن جازاسىن وتەپ، شارتتى تۇردە بوساپ شىققانان كەيىن، تسەرەبرالدى سال اۋرۋى بار قىزدى زورلاپ، دوسىن دا قىزدى زورلاۋعا ماجبۇرلەگەن. وعان قوسا، كيكنادزە قورعانسىز قىزدى سوققىنىڭ استىنا الادى»، – دەيدى ءتاڭسارى.

«قاراعاندى ​​وبلىسى ساتباەۆ قالالىق سوتىنىڭ 2014 جىلعى 9 ساۋىردەگى ۇكىمىمەن كيكنادزەگە قازاقستان رەسپۋبليكاسى قىلمىستىق كودەكسىنىڭ 120-بولىگى 2-بولىگىنىڭ «ب» تارماعىمەن 7 جىل 6 ايعا باس بوستاندىعىنان ايىرۋ جازاسى تاعايىندالدى، جيىنتىق ۇكىمدەر بويىنشا وتەلمەگەن مەرزىم ءىشىنارا قوسىلدى، اقىر سوڭىندا جازانى وتەۋ ءۇشىن ارنايى رەجيمدەگى تۇزەۋ كولونياسىندا 8 جىلعا باس بوستاندىعىنان ايىرۋ جازاسى تاعايىندالدى. ارتىنشا 2020 جىلى قاراعاندى ​​وبلىسى اباي اۋدانىنىڭ سوت بۇيرىعىمەن شارتتى تۇردە مەرزىمىنەن بۇرىن بوساتىلعان. شارتتى تۇردە بوساپ شىققان قاندىقول قىلمىسكەر، بوستاندىققا شىققانان كەيىن تاعى دا بىرنەشە قىلمىستار جاساعان»، – دەيدى دينا ءتاڭسارى.

كيكنادزە 2020 جىلدىڭ 22 قازانىندا تاعى ءبىر ايەلگە شابۋىلداپ، زورلىق-زومبىلىق كورسەتىپ، ونىڭ ءاميانى مەن اقشاسىن تارتىپ العان. ال 27 قازاندا ليۋدميلانىڭ جيەنىن زورلاپ، ءولتىرىپ تاستاعان. كەلىنشەك ادىلدىك ىزدەپ «نەمولچي.كز» قورىنا جۇگىنەدى.

«بۇل ارەكەتتەرگە پوليتسيانىڭ نەمقۇرايلى قاراعانى سونشالىق، ەگەر ليۋدميلا دابىل قاعىپ، قىلمىسكەردى جازالاۋعا تىرىسپاسا، باسپاسوزدە اقپارات تاراماسا، ءبىزدىڭ قور اتسالىسپاسا، بۇل قىلمىس تۋرالى ەشكىم دە بىلمەس ەدى. ءبىز ناتاليانىڭ ىسىنە قاتىستى ەشقانداي ارەكەت بولماعانىنا تاڭ قالدىق. مارقۇمنىڭ تۋىستارىنىڭ ايتۋى بويىنشا، ءبىرىنشى مويىنداۋ ايعاقتارىندا كيكنادزە ءوزىنىڭ سىبايلاسى بولعانىن، ول ناتاليانىڭ سۇيىكتىسى بولعانىن جانە ول كىسى ولتىرگەننەن كەيىن ەدەن جۋىپ، قىلمىستىڭ ىزدەرىن جاسىرۋعا تىرىسقانىن، سودان كەيىن بارلىق كىنانى ءوز موينىنا العانىن كورسەتكەن. بىراق قىزدىڭ تۋىستارى قىلمىسقا قاتىسى بار ەكى ادام دا جازاسىز قالادى دەپ قورقىپ، بىزگە جۇگىندى. ءبىز دەرەۋ جامبىل وبلىسىنىڭ پوليتسياسىنا جۇگىندىك جانە ليۋدميلاعا حابارلاماسىن جەتكىزدىك»، – دەيدى دينا ءتاڭسارى.

4 قاراشا كۇنى قىز ءوزىنىڭ جەكە پاتەرىندە ءولى كۇيىندە تابىلعان. كورشىلەرى دالىزدەن ولىكتىڭ ءيسى شىعا باستاعاندا توتەنشە جاعدايلار قىزمەتىن شاقىرىپ، ەسىكتى بۇزدىرعان.

«ءۇيدىڭ ىشىندە قىزدىڭ دەنەسى جالاڭاش كۇيىندە جاتقان. ءتىپتى ءىش كيىمدەرى شەشىلگەن بولىپ شىقتى. ءتىنتۋ جۇمىستارى كەزىندە پاتەردىڭ كىلتى بولماعان، قىزدى بىرەۋ سىرتىنان جاۋىپ كەتكەنى انىقتالدى. وعان قوسا پاتەردەگى توسەك جابدىقتارى دا بولماي شىقتى. سوعان قاراعاندا قىلمىسكەر قىزدى زورلاپ، ارتىنشا ولتىرگەنىن جاسىرماق بولعان. جانە پاتەردەن ناتاليانىڭ ۇيالى تەلەفونى دا تابىلمادى. پوليتسيا باستاپقىدا قىز ءوزى قاتتى ءىشىپ، ماسكۇنەمدىككە سالىنۋ ناتيجەسىندە كوز جۇمعان دەگەن بولجام جاساعان. بىردەن وقيعانى ادام ءولتىرۋ جاعدايى رەتىندە تىركەمەگەن. ناتيجەسىندە ناتاليادان كەيىن تاعى دا ەكى ايەل ءدال وسى قاندىقول قىلمىسكەردىڭ قولىنان كوز جۇمدى»، – دەپ ءتۇسىندىردى دينا ءتاڭسارى.

كيكنادزە 29 قازان كۇنى كەشكە ول ەر ادامدى توناپ كەتەدى. 16 قاراشادا 77 جاستاعى زەينەتكەردىڭ كوزىنشە 1978 جىلى تۋعان ايەلدى زورلاپ، سودان كەيىن ەكەۋىن دە ولتىرگەن.

قازاقستان رەسپۋبليكاسىنىڭ پروكۋرورى مەن اۋىر قىلمىس ىستەرى جونىندەگى سوتى كيكنادزەنى ءومىر بويىنا باس بوستاندىعىنان ايىرۋدى سۇرادى، بىراق سوت 25 جىلعا باس بوستاندىعىنان ايىرۋعا شەشىم شىعاردى. وتەلمەگەن ۋاقىتى ءۇشىن تاعى ءبىر جىل بەردى. الايدا دينا ءتاڭسارى مۇنداي شەشىممەن كەلىسپەيتىنىن ايتتى.

«كيكنادزە ومىرباقيعا باس بوستاندىعىنان ايىرىلۋى كەرەك. قازاقستاندا ايەلدەر مەن قىزداردىڭ ءومىرى تۇككە تۇرعىسىز، ءبىزدىڭ ەلدە زورلاۋشىلار پارلامەنتكە بارىپ، بالالاردىڭ قۇقىقتارى تۋرالى زاڭ قابىلدايدى. ءبىزدىڭ پوليتسيا قىزمەتكەرىن ولتىرگەنى ءۇشىن ءومىر بويىنا باس بوستاندىعىنان ايىرادى دا، ايەل ادامدارعا مۇنداي قورلىق كورسەتكەندەردى مەرزىمىنەن بۇرىن بوساتادى. بۇل ايەلدەرگە قاتىستى گەندەرلىك ديسكريميناتسيا، ءبىز ۇكىممەن كەلىسپەيمىز جانە شارتتى تۇردە مەرزىمىنەن بۇرىن بوساتۋ قۇقىعىنسىز ءومىر باقيعا باس بوستاندىعىنان ايىرۋدى سۇرايمىز»، – دەيدى دينا ءتاڭسارى.

"ادىرنا" ۇلتتىق پورتالى

پىكىرلەر